二零五零年 – 我女神係暴徒: 第四十三章

「我要進去! 你敢動我嗎?!」我繼續踏步向前, 兩個守門武警向後退左半步, 佢地互相對視, 再望左望後面, 不出兩步已經到入口, 退無可退。
 
「實在沒辦法了…熊先生, 我們也是有任務在身的! 有怪莫怪啊…有怪莫怪啊!」「你們兩個! 不要讓他再前進! 禮貌點…禮貌點啊!!」王隊長吩咐佢既部下阻止我…似乎撻老豆個朵似終係有極限…
 
兩個武警遞起雙手…好似玩相撲一樣想推開我但又唔多敢掂到我…佢地似乎猶疑緊點樣有禮貌咁推開我。其實…呢隻大門係需要拍卡解鎖先開到, 佢地根本唔需要欄住個門口…
 
我都無委任證又點自己打開隻門呢? 可能佢地見我行埋隻門度所以以為我有證開門呱?! 但係…我知道就算我無證, 總有人會開門比我, 因為裡面總有武警會自己行出黎呀!
 
就係呢個時候, 通道大門突然打開左。有一個好大隻既武警由通道裡面打開門想行出黎, 佢見到門口既情況就定左格呆住左, 佢所望到既畫面的確係有少少混亂, 有兩個武警守係門口然後扎左一個相撲既馬步…伸手想推開我, 而我既裝扮即係普通平民…除左個頭包住左之外。
 


機不可失! 大家都重猶疑緊之際, 我下定決心烏低身由佢地三個人之間鼠過, 但我偏偏就計算少左一件事…岩岩行出黎既呢位警官, 佢根本都唔知道我係乜水…
 
「哇! 你什麼人啊! 怎麼把頭包裹著的?! 你強闖警署嗎?! 你娘親的!」我身體正水平線超越左開門果位警官之際…我感覺我衣領後面比人拉住左, 然後有一股好大既力量將我成個人扯番轉頭…然後將我凌空拋起左, 我就仆番向大堂入面。
 
「少尉閣下! 停手啊! 他…」我隱約聽到王隊長把聲。
 
當我嘗試爬起身之際, 我就見到少尉一腳踢緊埋黎…「你媽的!」佢一腳踢左埋我個頭度「哇…!」…突然意識開始模糊, 我唯一清醒知道既一件事係…我好L痛!
 
「啊!!!」「死定了!!!」「不要啊!!!」我聽到大堂另外幾個武警都大叫出黎。
 


我見佢地幾個人埋黎拉住左少尉。「停手啊少尉閣下!! 不能打啊…不能打啊…會死的啊!!」
 
「他死關我屁事嗎? 你們走開!」
 
「不是啊…是我們會死的啊!!」「對啊!」「對啊! 會死的啊!」
 
「胡言亂語! 王隊長你們幾個人都搞不定這隻瘦骨猴子嗎?! 靠腰! 媽的!」雖然佢地三個人拉住阿少尉…但少尉仍然補多腳, 大力踢左落我個肚度。個肚比佢踢中果刻…有種透唔到氣既感覺…「咳! 咳!...」佢係唔係一腳踢晒我身體入面既空氣出黎呀…?!
 
呢個時候, 通道大門又打開左, 我見到有一個年紀較大既長官…後面跟住幾個人一齊急步行出黎。「停手!!! 你們全部停手!!!」「叫你們停手啊!! 聽不懂國語嗎!!」我聽到老長官喝止左少尉, 而少尉佢…由準備起腳執多我一劑既狀態, 迅速變為立正敬禮。