[舊版][已停更]從前有個校長，佢禁錮咗全校人: Day 10b 討論

8：30
我趁着所有人仍未起來時，溜回2B的課室，假裝自己從未離開過。在經過三樓走廊，昨日青蛙命喪之處，地面一片焦黑，遺下空白的正方印。鐵盆和打回原形的青蛙都消失了。我猜應該是其他怪物拿走了，青蛙的真身就這樣被牠們抹去，證據只存在我記憶中。

回到課室以後，所有人都一如我所料地熟睡，只有文柔不安地翻身。我溜到昨晚睡下的位置，不小心撞到了桌角，文柔立即彈了起來，機警得像個殺手。我背向着她，心虛地閉上眼入睡，暗暗猜測着其他人多久才會發現青蛙之死。又會用多長時間得知是我所為呢？

今晚九點，當那個excel表再次被打開，所有人都會見到2B班在一日內，多了50％傷害，再度成為頭號敵人。

9：15
我是被一陣談話聲吵醒，小睡片刻令腦袋比剛剛清醒。我睜開眼坐起身，班中的人都在熱烈地討論着，七嘴八舌的，令我聽不清內容。
「咩事呀？」我問。




「早晨小年，」阿康說，我點頭回應「你知唔知呀，尋晚青蛙俾人殺咗啊？」

「青蛙？」哇塞……這麼快就知道！
我驚訝的表情被阿康解讀成對於青蛙被殺的震驚。
「係呀！」黃美娜悄悄地反白眼「中四有好多人都見到，死淨嗰啲都喺度大肆宣揚。」

「劉加皓佢哋都在場，我估應該唔會係假呱。」阿康說。
當然不是假了，我還親手救了星雨！
「不過唔知係邊個做囉，應該唔係5D同4A，如果係嘅明哥同趙正儀一定會出嚟認叻。」Moon直擊重點。





「今晚應該會知，睇下嗰表上面邊班突然暴增傷害咪知囉，佢哋班一定會一身蟻。」程紀靜說，一滴冷汗流到我後脊。
「仲淨返四隻，一隻未知，一隻昆蟲，兩隻動物。」芯培冷靜地分析「曱甴會易打過老鼠。而家有一班領先，我哋都應該做返啲嘢。」

「怪物討伐小隊，重新成立！」阿康興奮地舉手，所有都心照不宣地別過頭。
「唔好講怪物住先，以其他班嘅作風，一旦知道邊班殺咗青蛙，難不免又一番惡戰。」Katie打斷我們的對話說。
「你係話你嘅作風呀！」咸魚在課室另一頭聽到後，立即一翻自眼反駁「最想殺晒其他班嗰個唔係你咩？」

Katie紅了臉，咸魚不屑地嘲笑她。
「對比起怪物，清除敵人比較容易，無咁危險嘛。」
「而且仲殘忍啲、冷血啲、無人性啲囉！」咸魚反唇相譏，Katie在此口舌之爭中大敗。





「唔止佢，有好多班都有咁嘅諗法。」我說，憶起賴明謙殺人時不顧一切的樣子，還有趙正儀引爆炸彈時臉上的狂喜。
簡直是喪心病狂，我心想，我一定不會成為這種以殺人為樂的瘋子，只會用雷電去解決其餘的怪物，就好似殺死青蛙一樣。

「反正我唔會去殺其他班嘅人，生存已經夠難，何必扼殺佢哋嘅希望呢？」阿康說。
「2C班死淨一個，中三全級都岌岌可危，總數加埋仲少過我哋。中五中四各有一班滅班，所稱得上係我哋敵人嘅得返9班。」我分析道，並隱藏了黃若薇班的真相。

「進度都幾快喎。」Moon笑笑說。
「而且我哋都已經連續五日穩坐喺頭五嘅位置，所以有咩好驚呢？」我望向Katie雙眼，挖出她的怯懦和惶恐。
「有備無患……」她堅定地說。

是甚麼給了她這份自信和堅定，明知道我的決定才是對的，也要為自己找借口？難道她不知道反對我們這些理智且合理的意見，只會令班中的人更討厭她(雖然這正中我下懷)？她不怕會有人如張凱璇一樣，斬下無能主席的頭，再自己取而代之嗎？

算吧算吧，她的思想豈是凡人可看透的，別管她……
「有備無患嘅定義唔係要我哋殺死同學，呢啲叫趕盡殺絕！」不少男生都對Katie不滿，除了一向明白事理，又暗戀她的安家迪以外。




「咪講笑啦，我哋唔郁手嘅，唔通一碌木企喺度等人殺？每一個行動你哋都有份參與，偽君子。」她說。

「我哋梗係睇你頭㗎啦，你係最大最巴閉嗰個。不過而家睇嚟，你好似唔夠格做我哋嘅領導者囉。」
「我唔夠格？當初開學嗰陣，係你哋選我做主席，唔係我搶住拎呢個牌㗎。」Katie扯起別在胸前的主席名牌。

「成個過程公公正正，民民主主。」
「而家係喺一個會死人嘅垃圾遊戲入面，我唔想因為你嘅自私而死。」
「死無葬身之地……」某人扮鬼說。
「就係因為我想帶大家離開，先……」

眾人的爭執持續了很久，我在旁聽得幾快樂。但亦想起對全校而言，現時理智合理的行動，就是盡快找出最後兩個的時間旅行者。這件事只有我們能做，我不禁想像當我成為主席，指揮所有人進行搜索行動的畫面。