[舊版][已停更]從前有個校長，佢禁錮咗全校人: Day 3f 康溢陽視角:怪物討伐小隊

第十二章
17：00
剛回到留堂室就見到我最想見的人，我對着她一笑，但她只尷尬地別過頭。沒所謂吧，反正大家都被困在這個空間，來日方長。其他人都在喋喋不休地討論明天那場魔法師之戰。

「我覺得火嗰個勝算好大囉！」
「未必㗎，師搏風今日咁勁揪，有水同土牽制火嘅，佢都有機。」
「算吧啦，佢今日俾人打到瞓低，聽日又話有咩分別啫！」
「其實點解佢哋要殺對方嘅？」

「因為佢哋貪！殺咗其他魔法師，就可以拎埋佢哋張卡，有齊四分之三種元素。咁咪天下無敵囉。」這麼天才的推論當然是出自我口中。




「哦～」程紀靜和她幾個朋友恍然大悟。

她們的目光有點怪怪，算了，這不是重點。現在已經五點了，灰色的天空也慢慢染上不明顯的橙色。
「Katie，我哋要唔要去打怪呀？」我問坐最前排的Katie。
語畢，班中全部人都看着我。他們眼中有驚訝，有不解，有厭惡，然而我並不認為我這個提議有甚麼問題。

「食懵你呀？無啦做咩要去搞嗰幾隻嘢？」羅雨韋從椅子很大動作地站了起來。
「係囉…萬一我…我哋又有人死…死…死咁點算呀？」程紀靜的朋友黃美娜裝得可憐楚楚，結巴着問。
「但我哋唔殺怪點上到頭五，上唔到就走唔返出去。可能呢一世都唔會離得開呢度，怪物就係我哋打開大門的鑰匙，唔通你哋唔明咩？」想不到那個她會為我說話，內心甜絲絲的。





「我同意我哋應該出去打怪，但有邊個願意出去呀？」Katie掃視留堂室一圈。
「我！」黃美娜突然很積極地舉起手。
「你咩技能呀？」Katie皺起眉問。
「呃……我係動物卡嘅。」
看到她眼望向右方，我就知道她在說謊。通常在編故事或說謊時，人總會很自然地看向右方。

我從褲袋拿出昨天打敗那個中五生得回來的卡牌，那是一張黃卡—【技能窺視者】。描述很短，總之使用後，我便可以一眼看到其他人的技能是甚麼。原本我還打算把卡牌留着，等將來有其他等將來有其他更強的技能才作出選擇。但如今這個局面，不用也不行吧。

我利落地把黃卡折斷，它噴出一道黃色光柱後就消失。半响，我望向其他人身上，他們頭上便多了一小行顏色字是在說他們的技能。例如當我看向小年時，我見到她頭上有一項藍色的字體寫着造夢者和一些技能簡述(當我在測試時，全班都看着我像個無事人，若無其事地打量她)。





成功以後，我望向黃美娜。她的確是綠卡，但她是個麻醉師(食指觸碰到的生物可以隨使用者意願，麻醉身體或心靈)。好吧，是一個不錯的角色，但麻醉心靈是甚麼鬼？
「仲有無其他人想去？」拜託給我一個男丁！
「阿Moon話想去喎！」小年捉着月亮的手高高舉起來「我都想去，不過我係藍卡，淨係會拖累你哋。」
「你點會拖累我哋啫，不過唔去都啱嘅，太危險啦。」我直接地說。

「呵，所以危險嘅嘢你就唔想佢去，其他人你就無任歡迎？」月亮似笑非笑地翻白眼。
我以為我表現得很明顯……
「你係戰士，唔驚死呀嘛！」我回敬她一個白眼。
「我都可以去！」Tony瞄了一眼賢仔後舉手說。
「咪去！」羅雨韋再度很大動作地站起來。
「我係【柔道專家】喎，唔係唔去呀？」Tony說。
「頂，你估你去劈木板呀？」
Tony明顯因羅雨韋的說話而動搖了，但他再次偷偷地看了一下賢仔後，便堅定地點了頭。

有貓膩，不過都不重要了。現在只有兩男兩女，戰鬥力…唔，慘不忍睹。




「揾多兩個紅卡綠卡嚟啦。」
「I think I can give it a try！」ABC仔安家迪(一個圓滾滾但十分幽默的男生)操着一口流利的英文說。
他是綠卡【猴子】，可以幫忙吸引怪物的注意力。
「我都去打架！」Patrick磨拳擦掌地自薦。
敲定了，周玥怡、黃美娜、安家迪、郭天朗、林昭偉和我就正式成立這個怪物討伐小隊。除了黃美娜以外，其他人都對此名稱感到萬分不滿，但我才不在乎他們的想法。

17：30
我們一行六個人拿着經方sir打磨的菜刀、肉刀(這已經是最強的武器了)，還有少不了化學炸彈以及大鍋蓋充當盾牌，向着一樓的蟑螂出發。據月亮所說，他們第一次遇到怪物就是在一樓的美術室門外，所以牠很大機會在一樓徘徊。而且牠好像非常怕火，但火並帶不到太多傷害，我們的物理攻擊才是最關鍵。

作為隊伍中年紀最大的一個(其實也只有14歲)，自然就得擔當起隊長的責任。我們潛步到後梯，靜靜地來到了一樓。音樂室是在美術室旁邊的，兩間課室之間有一邊門可以通過去，要是門被鎖上的，亦可以爬窗(要是窗都被鎖的，就管他的衝入去！)。

Tony把耳貼在音樂室門上，再三確認裡面沒有人才打開門讓我們進去。
「好啦，我哋應該分頭行事。揾兩個人出去敲美術室嘅門，吸引曱甴嘅注意，然後我呢邊四個人就由呢度門衝入去！」我說。
「無問題，我跟你去！」黃美娜踴躍地說。
「呃……好呀。」原本我打算讓她當敲門的那個，不過她衝去麻醉蟑螂也是個不錯的選擇。




「小年叫我睇住你㗎，所以我一定跟你！」月亮說。

真的嗎？！我內心好像爆開了一朵又一朵的煙花，絢麗奪目，五彩繽紛的。
「好呀，本身你就應該排最前去放化學炸彈。」幸好音樂室只開了一小盞桌燈，不然被月亮看到我臉上壓不下的笑容，那我就完了。
「我同Tony可以負責敲門，Patrick嘅【筋肉人】比我哋更有用。」安家迪說，他說英文時總有着濃濃的英式口音。

「對錶。」Tony伸出手腕上展示出上面的手錶說。
很聰明的做法，但我們都沒帶手錶。
「吓，你哋全部都無帶錶？」大家一致地點頭「咁對手機啦！」

「而家係17：36：08，等到17：37：38，即係一分半鐘後，你哋負責敲響美術室同呢間房度門，俾個signal我哋。收到信號五秒後，我哋就會衝入去。OK？」我簡短地說了我在路上構思的計劃。
大家再次點頭，安家迪和Tony便出了去。
「月亮你排最前放炸彈；黃美娜排第二負責麻醉隻曱甴；Patrick你第三，入去之後即刻撲倒隻嘢，然後我同你進行攻擊！」
「叫我美娜呀～」
「……」




「等等先，如果隻怪唔喺入面呢？」
「吓？」月亮問號。
「吓？」我問號。

對呀，我們從不清楚隻怪物是不是在美術室內，剛剛的計劃是建基於蟑螂一直都在美術室的假設上。如果裡面沒有怪物，那就白忙一通了。
「叩叩叩……」17：37：38了，門被準時敲響，那只能繼續照計劃行事。

五。四。三。二。一。
門被月亮推開，極級強烈的腐臭和腥臭味從門內湧出。那一種臭並非筆墨可以形容，我寧可在垃圾站住一年，也不要在這裡待一秒！

「嘔！」我們四個忍不住在原地大吐突吐，到底有多少屍體，流了多少血才會有這般難頂的噁臭？
月亮在剛剛千均一髮間，關上了門，再晚點，我們四個一定會臭死！門的另一邊傳來了嘰笑聲，令我毛骨悚然。

「係…係曱甴嘅笑聲呀……」月亮往後踏了一步，從口袋拿出紙巾抹嘴。
「係我哋考慮得唔夠周全。」我向月亮伸出手，示意我也要紙巾。




「係呀，你係！」她惡狠狠地剜了我一眼，然後把紙巾扔給我。
「邊估到隻怪咁狡惑，可？」黃美娜輕輕撞了我一下。
「……」
「出去叫埋佢哋走啦。」Patrick說。

怪物討伐小隊任務一—宣告失敗。

17：40
因此我們的殺怪計劃只進行了十分鐘就失敗，殺怪物這回事呢，還需從長計議。
「你死啦你，我要話俾小年聽，你同嗰黃美娜有路！」月亮在上樓梯時悄聲說。
「WTF？」我用口形爆粗，「你邊隻見到我同佢咩咩呀？佢咁肥！」其實黃美娜算不上是肥胖，頂多是豐滿而已。
「呵。」
「咪話俾佢知呀，靚女。」祈求天神不要因為我昧着良心說謊而懲罰我。

媽呀！我的終身幸福呀！