真人真事 由毒男變賤男嘅人生故事: 02
就係咁，我慢慢開始主動搵Nicole傾計。
我地咩都會講，幾無里頭幾九唔搭八都會傾
『就似沒有話對你不說，由手機到雞尾酒，由番茄講到北美洲。』
但係我地嘅交流，永遠都只局限喺手機度。
就好似一度永遠都打唔開嘅門咁
『我卻沒有講我很愛你』
仲記得小學嘅時候
我一直都只係得阿政呢個朋友，直到你嘅出現
每日小息一齊玩紅綠燈
每日放學一齊返屋企
但係唔知由幾時開始我地嘅交流就只限於手機
相處間亦多左一份尷尬
返返黎先
話咁快中學第一次嘅camp 就黎了。
班主任MIss Wong 喺去camp 之前捉左我去傾計
「我見你同啲同學都相處得好好，我地今次camp 分左好幾組，不如你做其中一組嘅組長啦」Miss Wing 同我講
「吓...我試下啦」作為一個毒撚係唔識拒絕人
「咁比個分組表你睇下你嗰組有咩人啦。」
「好...」
我望一望個分組表。
嘩全部都唔係好熟
另外有一個名我係特別留意嘅
『陳雪怡』
冇錯佢就係我地班嘅冰山美人，大家都叫佢阿雪
我一句野都唔夠膽同佢講，我又點能夠做佢組長
就係咁，呢個camp就喺我戰戰兢兢嘅心情下開始左
一開始就當然就係改下組名啊，破下冰咁
好在大家同班左兩個月，氣氛都唔會尷尬
改做名嘅時候大家都好興奮，比好多意見
但係一直都諗唔到一個好聽又有意思嘅組名，我見阿雪一直都冇咩出聲
於是我鼓起勇氣去問佢
「阿雪你有咩提議啊」
「不如叫嵐啊，代表我地好似風暴咁贏曬所有分組遊戲。」阿雪好興奮咁講
個名夠中二，我鐘意
「同埋我想我地可以團結啲，贏曬啲遊戲.........仲有要.....」阿雪路不停咁講
我心諗佢平時咁靜，原來佢係一個咁熱血嘅人
之後嘅活動氣氛都好好
去到夜晚玩夜行嘅時候要分兩個人一組
而我地係唔會知自己抽中邊個，要行埋一齊先知邊個同你一組
而兩個人入面有一個人要矇眼，要互相扶持先得。
面我就係矇眼嗰個
有個老師慢慢咁行過去我隔離帶我去partner度
我一行到過去就聽到一把女聲同我say Hi
我認得呢把聲，唔通係阿雪！？
「阿...阿雪？」我好怕醜咁講
「係啊，係我啊！」真係阿雪
我怕醜到唔知講咩好
佢捉住我隻手，好滑，仲要捉到我實一實
搞我都紅都面曬
一路上我都唔係好講野，反而佢一直喺度講野搞到我唔知點答好。
「其實我一開始都好尷尬好怕醜架，但係有個傻仔組長好努力咁帶動氣氛，所以我先冇咁尷尬咋。」阿雪冇啦啦講
比佢咁樣講一講我唔知點答好，淨係笑一笑就算
「多謝你，黎緊呢3年多多指教喇。」佢再講
「吓...哦..好啊」
呢一次夜行入面佢一直同我講野令到我了解得佢多左好多。
去到第二日...