真人真事 由毒男變賤男嘅人生故事: 01
「個死仔好似就黎返香港喇喎」一個肥肥地皮膚好白嘅男仔講
「係喎，個死仔呢6年真係變左好多」另一個瘦瘦地幾靚仔嘅男仔答佢
呢兩個男仔就係我死黨阿謙同Vince，佢地口中嘅死仔當然就係我林柏煬，呢個係我嘅故事。
仲記得第一次返中學嗰日，我一行到入課室即刻見到幾個熟識嘅面孔，當然包括我小學同我入同一間中學嘅老死阿政。
我一見到阿政就即刻坐佢隔離。
我掃視左一下我地班，成班28人得6個女仔，質素亦都唔太好。冇計啦我地係最差嗰班啊嘛。
但係有一個女仔，佢好白，有一把烏黑嘅頭髮，
五官標致，面無表情就好似永遠都唔會接近佢咁，係喇就係冰山美人咁。
「好靚...」我忍唔住講左出口
「阿伯你咁快有目標？小學個Nicole唔要嗱？ 」阿政串串共咁講
「唔係啊我要Nicole啊」我即刻解釋
Nicole 係我小學中意左6年嘅對象，而我啱啱問到佢Whatsapp 開始同佢傾計。
啱啱講完就有一個50路嘅肥婆走入黎我地班房，我同阿政都心諗：唔撚係呱
冇錯，佢就係我地嘅班主任Miss Wong
跟著搞完一大輪迎新嗰啲野過多兩日就開始正正式式上堂。
返左學一個月我同班同學都越黎越熟，我同Nicole都開始越傾越多計。
「星期六你返唔返小學探老師啊？」Nicole 係Whatsapp 問我
阿政一望到我部手機彈左呢個messge 出黎即刻笑笑口咁講「機會黎啦飛雲」
作為一個未拍過拖嘅怕羞仔我塊面曬咁講「有機會咩...?」
「梗係啦約得你出黎喎」
「吓...咁我試下主動啲啦」
我即刻打開手機覆返Nicole
「Hi, 我ok 啊」
「咁到時喺小學見啦」
「ok see u」
我開心到彈起，即刻攪住阿政9叫。
冇錯細細個追女仔嗰陣就係咁，好熱血，好青春，好易因為個女仔嘅一句說話或者一個小動作就會超級開心又或者好失望。
但係唔知由幾時開始呢一種激情，呢一種青春熱血慢慢會淡，可能係因為時間，亦都可能係因為大個左諗法成熟左。
但係我唯一知嘅係呢種感覺冇左就唔會再返黎。
話咁快黎到星期六，我約埋阿政同Vince 喺地鐵站等跟住一齊行去小學。
一入到小學我即刻變到好緊張，四周圍望睇下Nicole 喺邊度。幾經辛苦終於喺茫茫人海中揾到佢嘅身影
佢著一件白色T恤，牛仔熱褲好青純，好靚。
我呆左咁望住佢幾秒，佢都冇留意到我。
當佢望返過黎嘅時候我即刻望去第二度。
明明佢就喺眼前，明明我好想同佢講野。但係喺佢面前，平時好多野講嘅我竟然一句野都講唔到
就係咁我只能夠一路同人social一路喺遠處留意住佢。
咁就過左成日，一句都冇同佢講過。
同我想像嘅好唔同。
我以為我可以好大膽咁搵佢講野...我以為
喺呢一刻我終於明白如果我再唔大膽啲同佢講野嘅話，我係唔會同佢拉近到距離。