有一日，我住左入精神病院: 十七、外人

「肥仔明我同你講過幾多次啊，呢度唔帶得其他人入黎架嘛！」

「姐姐...姐姐幫我搵玩具。」肥仔明知道自己做錯事，嚇到就黎喊咁款。 

「我俾個密碼你，係等你可以俾人蝦嘅時候匿埋，唔係亂咁帶外人入黎啊！」

咩外人喎... 況且我又唔係自願入黎嘅，係個肥佬格硬拉我入黎咋嘛。幾廿歲人仲要玩啲咩閃令令戰士，喺度阻頭阻勢。 唉，搞到我又要入返黎呢個爛鬼病房喇。

於是蕎蕎將我地帶返去病房入面，一路行一路係咁叫肥仔明以後唔準再整唔見個玩具。我都唔明，一個公仔咋嘛，又殘又舊咁，有乜好執著。





「拿蕎蕎姐，今次真係唔關我事架。不過究竟個公仔係咩事啫，點解好似好重要咁嘅？同埋你頭先話咩肥仔明俾人蝦，係邊個蝦佢？係咪呢度啲病人？」 

「...你唔好理咁多啦。我知今次唔關你事，早啲訓啦。」蕎蕎一路迴避我嘅眼神，好似收埋好多秘密，唔講得俾我知咁。