有一日，我住左入精神病院: 七、肚餓
對「小朋友」就咁溫柔，對我就咁惡，好聲好氣啲駛死嘅...
再講，雖然知道眼前嘅肥仔明只係智商唔正常，但我對佢咁怪誕嘅行為都係好反感。佢就好似街上面嘅怪叔叔咁，雖然高我成廿厘米，但就扯住我衫角，扁曬嘴咁唔俾我走。
不過，我都係無再理佢，繼續向前行。
嗯... 好香嘅飯菜味，睇黎而家應該係放飯時間。都唔知我喺房入面瞓左幾耐，個肚一早餓到扁曬。
前面應該係飯堂，個個病人都攞住個餐盤，坐曬喺度。雖然理智同我講我應該儘快逃離呢度，但餓到無曬力嘅我都係抵抗唔到食物嘅誘惑。
我徹底輸左俾食物嘅吸引力，衝去好似自助餐咁一盤盤擺喺長枱上面嘅食物度。雖然都係一啲好似咕嚕肉、炒菜心咁嘅家常便飯，但對我黎講已經係珍饈佳餚。