Dark．Post: Episode 04

"你嘅意思係我唔應該交條list比你?"， Freddy的回應驢唇不對馬嘴，Edith一時間應對不來，就在此時電梯門打開，Freddy說：「無咩其他事啦嘛？無嘅話就再見。」說罷，Freddy走進去。

Edith看著Freddy不負責任的態度，火起三丈，同時也跟著他走進電梯。電梯內只得他倆，空氣凝住了，Freddy注視著Edith，感到她不懷好意，確實，Edith滿肚子壞主意。

在甲級寫字樓工作的他們，樓下就是購物商場，Freddy本來準備電梯門一打開，便極速混入人群之中逃去，豈料電梯門打開的一剎，Edith突然摟住Freddy的手臂。

這次輪到Freddy反應不來。

Edith說：「跟我嚟！如果唔係我嗌非禮！」





Freddy：「喂，明明係你非禮我喎。」Edith沒有理他，繼續拉著他走，一直走，走到公司的化妝品counter，Edith才停下來。

Edith說：「Freddy Li，你自己去睇下，買呢條product line嘅人，個age range係咪咁年輕？唔需要即刻答我，我哋企係到睇五分鐘。」

Freddy觀察了一會，買這類產品的人，確實不年輕。他對Edith說：「係，係年紀大啲，答咗你問題啦，我走得未？」

Edith說：「未得！既然你知道呢條product line嘅人唔年輕，係唔係有負任重新整過條member list比我？你比我嗰條list，全部都咁年輕，你叫我點blast出街？response rate點會好？」

Freddy說：「雖然你講得啱，但我亦唔覺得自己做錯，我跟足你比我嘅requirement，公司嘅definition去做，所以我唔覺得自己要重新整過，再見。」





Freddy準備轉身離開，Edith再次拉著他的手，說：「你知唔知呢條product line就係想留住之前由細用到我哋大，隨住個brand成長嘅顧客？而公司嘅definition就係cover唔到呢個case！係，你無做錯，但你無做得更好！如果你剩係跟住requirement，一個IT仔都識做啦，點解要有你呢個Data人？」

Freddy說：「就算你講得啱，點解我又要唔跟公司嘅definition，去陪你癲？我無得益。」Edith的話確實令Freddy有點動容，但Freddy依然故我。

Edith說：「Freddy，你唔覺跟住definition嘅人生好悶咩？做Marketing就係想做個爆嘅廣告，做個最動人嘅event，尋求一次最燦爛嘅火花！我係呢間公司已經失去熱情，去到尾聲架啦！再無成果就辭職架啦！我之前幾個campaign都plan得好好，但次次都係條member list出事，我真係希望完美咁完成一次campaign，睇下有咩結果！design content我都識小小，但data我真係一啲都唔識，我真係好需要你幫手！我知你無錯，但你幫我今次啦！如果成績唔好，我都resign，你都見我唔到架啦，所以你幫我一次，可以嗎？」

在大型購物商場的大堂中心，二人默不作聲，離不開又不想留，嚴如一對吵架中的愛侶。

Freddy看著Edith迷茫又誠懇的雙眼，遲疑了一會，說：「一次，只此一次。」





Edith此刻心花怒放，說：「好！即刻講，我哋即刻返上去！」

Freddy說：「咁急？其實我入嚟無耐，公司嘅演變，好多嘢都唔清楚，我要有排理解，不如聽日先。」

「唔緊要時間我大把！擇不如撞！今晚慢慢講！」說罷，Edith再次摟著的手臂，把他拉回office。

Freddy看著這位充滿幹勁的Edith，想起幾年的自己…那位還未被陷害，處事還是腦頭傻腦，充滿傻勁的自己……幫一幫昨日的自己也好，試一試這幾年所學的知識也好，這次，就跟這位Edith小姐瘋一回吧。

[本故事全屬虛構，如有雷同，實屬巧合。]