《突然有條女同我同居》(冇甜): 70

佢就好似一隻失咗控嘅美國鬥牛犬咁，掙獰嘅臉孔上被濺上幾點血跡，嘴邊不斷流出口水，然後張開血盤大口，以高速撲向我！

正當我打算作出反應嗰陣，我嘅身體已經自動向左避開咗佢嘅攻擊。

只見佢撲擊失敗後，一落地就快速咁轉身，再次向我撲擊。

因為嚟唔切再次向旁邊閃避，所以我選擇向前盡量彎腰然後雙手撐地，啱啱好咁避開咗跳高咗嘅佢，我再利用佢因為喺半空中所以成身都係破綻嘅優勢，雙手用力支撐住身體，然後巧妙咁用右腳重重旋踢落佢暴露喺空中嘅右腹，佢隨即被踢飛撞向左邊牆上。

然而佢就好似喺戰鬥中唔怕痛嘅美國鬥牛犬咁，喺我企返起身之後，亦跟住企咗起身。



喺遭受攻擊之後，佢變得更加兇狠勇猛，而且仲好似有無限體力咁，無間斷咁向我攻擊，令我毫無喘息同反擊嘅空間。

然而喺佢嘅一大輪進攻下，佢嘅動作明顯咁變慢咗少少，令我得到思考空間，再次醒起自己擁有嘅技能。

面對下一次嘅撲擊，我並無作出閃避，而係舉起右手，作出一個握緊嘅動作，一面橢圓形嘅盾牌即時憑空出現，盾牌有我半個人咁高，而且比我肩寬闊少少，面向我嘅一面有一個握把，正俾我握住，而面向敵人所呈現嘅，係巨型陸龜嘅龜殼。

「獸裝。」，呢個都係我啱啱諗出嚟嘅名。

因為嚟唔切停低，所以佢就成塊臉正正咁撞落龜盾到，佢嘅兩個鼻孔隨即開始流血，而且仲從口中吐出一隻被撞甩嘅門牙。



然而佢仍然選擇不顧一切咁撲向我，今次我用盡全力咁以龜盾撞向佢，只見佢被撞飛幾米後陷入暗巷盡頭嘅牆上，成臉都係血嘅佢雙眼反白，就咁喺牆上失去意識。

「點解我唔早啲用呢舊嘢...」，我放低龜盾，行去以大字形陷入牆上嘅佢臉前，右手以銳利嘅指甲化爪，然後對準佢條頸。

只要殺埋佢就得，呢啲嘢對我嚟講冇乜難度，而且我有足夠嘅理由...

儘管我個腦係咁諗，但我隻手仍不禁震抖，如果...佢係俾人控制，或者威脅...

如果...有個人等緊佢返屋企...



但係...我唔可以唔殺死佢...

「真係咁樣？」，一把聲音突然喺我腦海中響起。

「我冇其他方法。」，我回答。

我吐出一口氣，然後準備出手。

「請你好好咁...」

「嚓！」

喺我講到一半嘅同時，佢額頭突然上突然出現咗一個血洞。

...係子彈？但係我完全冇聽到槍聲，就算係裝咗消音器，正常我都會聽到。



「啪嗒！」，我身後突然傳出聲音。

我立即轉身警戒，只見眼前嘅...

係一個戴住小丑面具嘅男人，身高大概米八，全身着住灰色嘅西裝，頸前嘅第一粒鈕冇扣到，一頭凌亂嘅黑髮，喺面具嘅雙眼上各開咗個窿，應該係為咗方便睇嘢，透過個窿可以清楚咁見到佢猶如大海般蔚藍嘅瞳孔，纏住繃帶嘅右手握住一把漆黑嘅手槍。

「初次見面～」，佢嘅聲線帶有一種狂傲嘅感覺。

「你想點。」，我做好戰鬥準備嘅姿勢。

「嘻～～哈哈哈～無嘢～我只係想食下花生啫～點知最後就忍唔住殺咗你嘅對手喇，真係...嘻哈...唔好意思呀～」，佢邊講邊狂笑。

「所以，打定唔打。」，我問道。



「唔打～因為如果殺咗你嘅話，我就無有趣嘅嘢睇架喇～嘻～哈哈哈！」，佢嘅笑聲有啲洗腦，不過雖然佢講嘢好唔討喜，但睇嚟應該唔係敵人。

「嗯～而家已經冇嘢睇，我都係走先喇～」，佢繼續講。

「順帶一提，我個名叫做小丑。」，佢講完之後，就突然開始落雨。

「下次再見喇～葉～正～希～」，佢一講完，就喺我面前，雨水中憑空消失。

佢到底...又係咩人。

我轉頭望一望頭先變成屍體嘅惡犬男，佢竟然喺我眼前...

變咗一灘血水...