《突然有條女同我同居》(冇甜): 69

「令每件我都可～擺～放～」,我唱完最後一句之後,鋼琴聲亦隨即慢慢結束。

「好!今日就練到呢度啦!跟住就好好放鬆心情聽日盡力表演啦～」,大叔拍一拍手再講。

我望向掛喺門口上面嘅鐘,只見喺不知不覺間已經去到三點,無記錯嘅話今日都練咗三個幾鐘,不過總算係做到滿意。

「你哋走先啦,我仲要留低搞少少嘢。」,大叔又講。

我同雲零點一點頭示意明白,行出學校門口嘅路途上,一班自願返嚟幫手佈置嘅同學喺度燃燒青春,可見呢間學校嘅學生,有幾咁重視校慶呢樣傳統嘅活動,呢股熱血嘅氛圍大概都仲可以維持到成個禮拜。



「嗯...呢種感覺都係同以前一樣。」,雲零望住四周勤奮嘅學生,忽然咁講。

「以前？」,我問道。

「嗯,我以前都係喺度讀。」,佢繼續四處張望。

唔怪得知佢喺呢度完全無違和感...

行到出學校門口之後,我哋就各自行唔同嘅方向返去。



然而當我行到一半嗰陣,我突然聽到前方轉右嘅暗巷傳來一啲奇怪嘅聲音：

「咕嗚嗯...格咯...」,係幾把低嚎同進食嘅聲音。

「哼,輕輕鬆鬆又一隻。」,仲有一把既低沉又粗獷嘅男聲自言自語。

喺可惡嘅好奇心驅使下,我慢慢行近聲音來源,每行近一步一股危險嘅感覺就逐漸喺身體上擴散。

終於行到轉角位後,放眼望去,只見暗巷嘅盡頭,大概十米外,有一群狼正兇殘撕咬住一具人類屍體,而旁邊有一個帶住黑色鴨嘴帽,但全身着住輕便運動裝束嘅男人,佢望住嗰群狼進食嘅同時,臉上亦掛住瘋狂嘅獰笑。



佢好似感覺到我嘅接近咁,慢慢擰轉頭望住我,然後保持住獰笑講：

「又有免費午餐...嘻...」

喺見到佢全臉後,我先發現...佢右邊嘴角有一條差唔多乾嘅血跡,然而佢全身毫髮無損。

「俾兩個選擇你,過嚟俾我哋食,或者係我哋食咗你!」,佢接住講。

「咁我就選擇...拎你嚟試試招。」,我嘴角不由自住咁掛起一絲微笑。

我嘅腦中自動閃過一段回憶...喺前幾晚嘅深夜時分,愛盈喺我身旁熟睡嘅時候,我突然從睡夢中脫離,然後腦袋豁然清醒,腦海中更好似安裝咗一個系統咁,一欄數據同技能圖,仲有一個圖鑑瞬間出現係腦袋嘅想像空間中。

喺呢幾樣突然出現嘅功能圖表上嘅文字中,可以明顯咁睇得出,佢描述嘅係我喺幾個月前獲得嘅「超能力」,而喺數據上顯示,目前能力已經覺醒到60%,技能方面就有六項,而圖鑑就展示咗我曾經用過嘅動物形態。

極簡短咁回憶一下後,我從容咁望住前方正跑緊過嚟嘅六隻狼,準備嘗試使用第一項技能, 呢項技能集結咗各種兇殘肉食性動物喺警告敵人嗰陣嘅氣勢。



我緩緩抬起腳,然後用力踩落地下!

「獸壓。」,呢個係我啱啱先諗到嘅名。

地面竟然裂出一道唔太起眼嘅痕跡,然後眼前一陣無形嘅波動喺空氣中擴散,只見眼前正打算撲向我進攻嘅一群狼,四腳急剎,然後用忠犬般嘅眼神乖巧咁望住我伸脷。

...睇嚟呢項技能幾方便,淨係用咗三成力就馴服到幾隻狼,但係仍然企喺暗巷盡頭嘅男人似乎冇受到影響。

「我班芝娃娃...竟然背叛我!」,佢咬牙切齒咁講。

佢哋係狼...

「就俾你睇下...我嘅惡犬潛能!」,佢雙眼突然變成血紅色,然後手掌化爪,帶住一股濃厚嘅殺意衝向我。



啱啱馴服嘅六隻狼,一感覺到危險就打算保護我,奮不顧身咁衝向敵人,然而作為原主人嘅惡犬男,反而毫不留情咁對佢哋大開殺戒,眨眼間幾隻狼就已經變成屍體,無力咁攤喺地上,空氣中開始彌漫住血腥味。

「...貓,老虎,獅子,50%」,我讀出三種貓科動物嘅同時,身體開始發生變化,雙手嘅指甲稍稍變長同變得鋒利,所有嘅感官亦敏銳咗好幾倍,全身嘅力量源源不絕,身後更好似多咗一條無形嘅尾巴。

「你已經俾咗我一個...殺死你嘅理由。」,我望住手腳並用,兼且失去理性衝緊過嚟嘅惡犬男講。