《突然有條女同我同居》(冇甜): 66
「餓呀～餓～」，呢把聲係...憶奇。
「而家幾點...」，我打咗個喊露之後緩慢咁坐起身。
「六點，我要食飯～」，憶奇跳上梳化講。
「嗯...」，我望一望仍然熟睡嘅愛盈，然後去倒糧俾憶奇同憶雪，隻腳仲係有啲酸痛...
「又食呢隻?好乾架喎...」，憶奇望住佢嗰兜份量啱啱好嘅乾糧，而憶雪就喺隔離安靜咁進食。
「咁咪飲啲水。」，我斟咗兩碗水俾佢哋。
「邊有貓會鐘意飲...水...」，喺憶奇講嘢嘅同時，憶雪開始飲水。
「...我收返...」，佢終於肯乖乖地去食早餐。
搞掂完佢哋嘅早餐之後，就到我去廁所梳洗，入到去之後我即刻照一照鏡，睇下隻眼有冇紅到...睇嚟冇。
之後我就同平時一樣，整好早餐，嗌醒愛盈，然後準時出門口搭車。要講有邊度唔同咗嘅話...大概就係比平時輕鬆自然咗。
返到課室之後，總感覺...氣氛有啲怪...而阿龍亦喺我坐低咗之後轉身，自動解答我嘅疑惑。
「聽講今日有個新嘅實習老師嚟教我哋數喎～」
「咁突然？」，我將第一堂要用嘅數學書擺喺枱面，然後伏喺上面。
「本來個阿sir好似話係移民咗去外國。」，佢繼續解答。
「唔怪得之今日啲氣氛咁樣...」，佢哋好似期待緊某啲嘢咁。
「聽講係個靚仔喎～」，阿龍打住喊露講。
「無興趣...」，我合埋眼打算休息一陣
然後不知不覺就完咗早會，準備上數學堂，喺老師嚟之前，愛盈正努力咁喺本書上面畫畫，而我仍然伏係枱面休息。
突然一陣輕盈嘅腳步聲進入班房，然後一道男聲響起：
「大家好，今日開始會由我嚟教數。」，呢把聲好似係邊度聽過...
我微微抬起頭望向佢，只見一個身材高挑而且望落幾精實嘅男人背向我哋，喺黑板上面寫緊嘢。
「我叫...」，佢放低支筆，然後轉身望向我哋，順便展示佢啱啱喺黑板上面寫嘅三隻字。
「滿雲零。」，佢微笑道，然後掃視我哋所有人，最後將視線停係我身上。
我笑住對佢細動作咁揮手，佢見到之後笑住咁摸一摸自己個頭，而我注意到佢右手手掌纏住咗繃帶。
自我介紹完之後，佢就開始認真教書，同好多老師唔同，佢教書嘅時候總係會令人感到精神，內容亦唔生硬，同平時朝早頭兩堂嘅氣氛好唔同。
喺落堂之後，佢示意叫我跟佢出去。
「你唔係讀緊大學架咩？」，我一出到去就直接問。
「悶得濟嘛，而且啲嘢我一早就識曬，所以咪返嚟試下教書。」，佢平淡咁講。
「就係咁簡單...?」
「係呀，而且又賺得唔少。」，佢講完之後輕笑一聲。
「係喎...我一陣要開會，下次再講啦。」，之後佢休閒咁行樓梯上去。
佢都幾...自由。
正當我諗住返班房嘅時候，我見到愛盈俾一個身型壯碩嘅師兄跟住，而愛盈見到我之後直接小步跑埋嚟。
「喂～你飛咗嗰隻廢柴嚟同我拍拖好過啦，我又有錢，又係跆拳道隊隊長，點係佢呢種垃圾比得上架。」，嗰位師兄態度輕浮咁講。
「師兄。」，我出聲。
「點呀...呀...」，係佢回答嘅同時，我鍊住佢條頸，然後將佢個人舉高少少。
「請你唔好搞我女朋友。」，我望住眼前不斷掙扎嘅師兄，微笑道。
喺佢望落好似就斷氣嘅同時，我鬆開手，令佢跌低，無力咁坐喺地下。
「唔好再俾我見到你。」，我保持微笑講。
「係...係嘅...」，佢狼狽咁逃走。
「嘻...返去喇。」，愛盈攬住我隻手講。
「嗯。」，我點一點頭，然後喺佢毫無防備嘅瞬間吻向佢嘴唇，同時對佢本來嘅所有追求者作出警告。
「...你好卑鄙呀...」，佢滿臉通紅咁抿笑道。
之後嘅堂，都係同平時一樣咁悶，眨眼間亦夠鐘放學，返到屋企亦好快就食完飯。
「希仔～～」，準備去沖涼嘅愛盈，係房入面嗌我。
入到房之後，只見佢一臉煩惱咁望住個衣櫃：
「做乜？」，我問道。
「呢幾日係咁落雨，所以我而家冇衫可以換...你有冇衫可以俾我著住先呀？」，佢扁一扁嘴之後講。
「我記得我個櫃桶仲有幾件之前著過中碼嘅衫，你求其拎一件嚟著住先。」，我指一指最底嘅櫃桶。
「yeah～」，佢打開櫃桶搵咗陣之後，喺入面拎咗一件全黑色嘅恤衫出嚟，然後用力咁索咗一下，唔怪得之我啲衫成日都有啲位皺皺地...
「唔該曬～」，佢用甜美可愛嘅聲線講，然後就走入浴室沖涼。
喺我睇咗一陣書之後，佢就沖完涼出嚟，只見佢嘅臉頰因為熱氣仲有少少紅暈，加上因為吹得太馬虎而仲有少少濕濕地嘅中短黑髮，而且身上只係著住一件差幾個碼嘅黑色恤衫，襯托佢除咗身高之外都接近完美嘅身材，令我個心臟都就嚟頂唔順。
我放低本書，企起身，行去佢臉前，右手㩒住佢左臉道牆，雙目直視佢講：
「我忍唔住喇...」
只見佢吞一吞口水，身體僵硬咁望住我。
「我要幫你吹乾啲頭髮佢。」，之後我就拖返佢入去好好咁吹乾佢個頭。
一齊睇咗陣動漫之後，我哋就返房瞓覺。
瞓咗落床半個鐘之後，愛盈已經完全進入夢鄉，而我仲係度諗緊今日發生嘅嘢，喺我望向佢嘅同時，佢突然轉身，白滑無瑕嘅後頸出現喺我眼前，可能係因為衣著嘅問題，佢而家望落比平時性感好幾倍，我個嘴好似出於本能咁自動張開，然後用犬齒輕輕咁咬咗佢條頸一下。
「嗯...」，熟睡嘅佢突然叫咗一聲，令我嚇咗一嚇，亦清醒返，再次面對眼前嘅美景，我咬一咬自己手臂，就開始瞓覺。
第二朝，愛盈一邊摸住條頸，一邊喺廁所行出嚟問：
「希仔～點解我條頸紅咗一忽仔嘅？」
「係...憶奇...憶奇咬嘅。」，我指住一臉問號嘅憶奇。
「哦～」，之後佢就坐低食早餐。
「你...」，憶奇行埋嚟講。
「兩個罐罐。」，我用心靈感應同佢講。
「哼，成交。」