《突然有條女同我同居》(冇甜): 65

食完嘢之後，我哋一行出舖頭嘅門口，就有一陣寒風無情咁迎臉吹埋嚟。

「都八點幾...返屋企啦...好凍...」，阿峰磨擦雙手手掌取暖。

阿峰啱啱講完，其他人就紛紛表示同意。

道別之後，我哋就各自行唔同嘅路返去。

係前往巴士站嘅路上，愛盈一直對手掌呼氣取暖，而我嘅身體因為能力嘅關係，好似自動適應咗呢種天氣，但我始終唔可以俾佢凍親。



「凍嘅話...」，我拖起佢隻手，同佢十指相扣。

「就拖實。」，我將佢隻手放入我件外套嘅衫袋入面。

「嘻～你隻手好暖。」，佢將佢隻左手放埋入嚟。

「咩動作嚟...哈...」，我笑道。

睇嚟由唔知幾時開始...我都俾佢嘅快樂傳染咗。



係歡笑間，我哋已經返到屋企。

「你去沖個涼，休息下先啦～」，愛盈㩒一㩒我僵硬嘅膊頭。

「嗯。」，我微笑後摸一摸佢個頭。

「咔。」，攞完衫入到浴室之後，我鎖好對門。

「呀...嗄...」，我背靠門坐低，雙手抱住左邊膝頭，忍耐痛楚咗一段時間嘅我已經再無辦法控制，相信表情都已經變到好猙獰。



「果然...用咗能力都係未可以完全復原。」，我細細聲咁自言自語，因為痛楚不斷來襲，已經連思考都有啲辛苦。

我維持咗呢個姿勢起碼十五分鐘，先可以再次企返起身，然後拖住軟弱無力嘅身體去沖涼。

沖完涼吹埋頭出嚟之後，我再次努力打起精神，坐係梳化等埋愛盈沖完涼就可以去瞓覺。

「好攰...」，我放鬆全身，望住天花板發吽哣。

視線開始慢慢縮細，身體亦越嚟越無力...

係呢種時候，一堆負面嘅思想突然湧入腦袋中。

「我只係想...有個人可以...」，我嘅身體慢慢失去重心，準備瞓喺冰冷嘅梳化上面。

「攰喇？」，一把溫柔嘅聲音係我耳邊傳嚟，感覺...好溫暖...



我慢慢打開眼，只見擁有天使般臉孔嘅愛盈，微笑住凝視我。

突然一陣鼻酸，雙眼嘅視線，漸漸模糊，臉頰不斷俾溫暖嘅嘢劃過。

奇怪...我...喊緊？

淚水不斷係眼眶中湧出，我幾多年冇係其他人喊過面前喊過...?

好似...有記憶以嚟就未試過...

「可唔可以...攬...住...我...」，我沙啞咁講出。

「緊係可以。」，佢溫柔嘅聲線...令我嘅淚水更加失控...



「以後...唔使咩都自己忍住架，知道未呀，至少係我面前，你就做返真實嘅葉正希啦。」

「...嗯。」

「辛苦曬你喇，一直以嚟。」

「...嗯...」，我緊緊咁攬住佢。

呢一晚，我好似喊下喊下就直接瞓着咗，兩個人就咁樣攬住...係梳化瞓咗成晚。