《突然有條女同我同居》(冇甜): 63

「大鑊...比賽可唔可以入樽？」，我望向裁判。

只見裁判點一點頭，然後吹哨示意比賽繼續。

然而惡霸嘅心態好似已經崩壞咗咁，不斷埋怨隊友，令佢哋成隊人都再無心機打，結果最後不出所料，我哋以21-0贏咗第一場嘅比賽，惡霸佢哋輸咗之後就即刻離開咗會場，令我無機會知道佢叫咩名。

之後遇到嘅對手，實力都係差唔多，所以我哋亦一路無阻咁打入咗決賽，冠軍就係眼前。

係決賽即將開始之前，我問阿龍：「贏咗會有咩獎品？」



「好似係1500蚊現金，一對精美嘅情侶鎖匙扣。」，阿龍雙手撐腰回答。

「個鎖匙扣係咪有啲多餘...」，阿峰嘅動作同阿龍一樣。

「一陣果對鎖匙扣歸我，千五蚊你哋兩個自己分」，我學佢哋雙手撐腰。

「無問題啦～」，佢哋兩個同時回答。

「好！決賽準備開始！請雙方球員上場！」，主持人保持興奮咁講。



我哋行到中圈位置，然後主持人繼續講：

「到齊嘅話，就等我介紹下雙方嘅球員先啦！」

「首先係『拎硬冠軍』隊！佢哋嘅成員相當犀利呀！有學界小前鋒評價中第二名，身高188嘅鄧伸！學界中鋒第六名，身高有米九嘅熊王男！同埋學界第八控衛，身高177嘅程解顧！」，主持人望住名單讀。

「而家睇下『好似未改』隊先!佢哋嘅成員係身高172嘅阿龍！194嘅阿峰！同埋186嘅希哥嘅！」，好彩頭先要求咗個主持人唔好講全名，同埋無講過我哋嘅排名。

主持人介紹完我哋之後就請我哋去包剪揼決定球權，結果都係一如既往咁猜輸咗。



開波之前，對手圍埋一齊手疊手，然後大嗌：

「俾佢哋睇下我哋呢種球星嘅實力！」，鄧伸嗌完之後自信咁睥住我。 

「今場...認真打。」，我對自己嘅隊友講，然後淺笑一聲。

「哼！緊係！」，阿龍燦笑。

「贏咗之後去食壽司！」，阿峰亦一樣，露出笑容。