《突然有條女同我同居》(冇甜): 62

當佢發現咗我嘅目光之後，就慢慢咁放低件衫，當無事發生過...

下一秒，對手嘅拍波聲就將我嘅注意力放返去場上。 

佢哋嘅氣勢似乎並冇減弱，係外線接到波嘅飛機冷靜咁指示隊友走位，佢將個波拍到去葫蘆頂，然後舉起左手嘅食指，睇嚟係諗住執行戰術。

我即刻加緊對車仔嘅防守，唔俾佢接到波，但係車仔竟然慢慢咁退到落底角嘅位置。再望返去飛機果邊，先發現佢原來係諗住單打身高同佢差唔多嘅阿龍，只可惜阿龍嚴密嘅防守已經令佢停咗落嚟，困難咁搵空位傳波，但係俾阿龍迫到就嚟跌低嘅飛機，只可以格硬出手，結果不出所料咁完全偏離籃框。

但係籃底嘅184努力咁孭位，終於拎到少少優勢嘅佢，充滿自信咁跳起，準備攞籃板，不過佔盡身高優勢嘅阿峰輕輕一跳，就係佢眼前收下一個籃板，攞到籃板嘅阿峰望到冇望就直接將個波傳到三分線外，最後俾阿龍巧妙咁接住咗。



阿龍接到波之後即時望向籃框，膝頭微曲，準備起手，而飛機同時跳起，阻止阿龍得分！

然而阿龍喺飛機跳起後即刻停止動作，向籃底嘅方向突破，最後係罰球線快速咁進行拋投！

「唰！」，籃球應聲入網，比分5－0。

籃球落地後，184拎起個波，然後傳俾仍然企係底角嘅車仔，而車仔竟然因為分心而接唔實個波，最後白白咁失去難得嘅球權。

「發乜吽哣呀你件垃圾！成碌木咁企係度有春用咩！」，184似乎忍無可忍，大聲咁責罵隊友。



「sor...」，車仔豪無歉意咁講。

「頂...我嚟守果條友，你去守個高佬！」，佢行前將車仔推向阿峰。

「吓...但係...」
  
「我話點就點！」，因為184嘅態度，我覺得佢幾適合叫做惡霸。

「嗶！」，裁判用哨聲示意阿龍可以係邊線開波。



我望一望阿峰，佢即刻明白到我嘅意思，上前做一個pick，穩穩咁擋住咗惡霸，我順勢切入，阿龍同時將個波傳到籃框右上方嘅位置，係一個啱啱好嘅位置...

「磅！」，一個Alley-oop，輕鬆簡單咁完成。

「痴線...佢明明...只係同我差唔多高...」，惡霸嘅氣勢好似被大幅減削弱，而且好似有少少腳軟。   

「大鑊...」

...

－係比賽開始嘅兩個鐘之前－

著住寬鬆睡衣嘅愛麗絲，坐係別墅客廳嘅梳化上面，一邊食薯片一邊睇動漫。

「嘩嘩嘩！兩兄弟拍埋一齊好型呀！」，愛麗絲全神貫住咁望住電視嘅畫面。



「咳...大小姐」，別墅內嘅老管家，亞柏突然出聲。

「嗯？」，愛麗絲嘅視線仍然冇離開電視。

「你之前唔係話...今日有比賽要打咩？」，亞柏聲線溫柔，將愛麗絲當係孫女咁問。

「...我...我驚我勁得濟！係咁贏曬會悶呀嘛，所以我都係決定唔去！絕...絕對唔係唔記得咗！」，愛麗絲心虛咁講。

「好...」，亞柏一臉無奈，準備離開。

「嗚...嗚...唔好呀...」，愛麗絲突然開始啜泣。

「咩...咩事！」，亞柏極速咁衝返去愛麗絲身邊。



「艾斯...唔好呀嗚...點解呀...」，只見愛麗絲原來係因為動漫入面嘅角色而喊。

「...你...慢慢...」，亞柏鬆一口氣之後離開。