《突然有條女同我同居》(冇甜): 11

返到屋企之後，我哋好快就換返出街衫之後唞咗陣唞到八點就再出門口，因為我哋要去嘅地方其實就係學校附近。

喺啱啱上到車五分鐘之後，巴士到站，唔知點解突然有好多打工仔上咗車，而我同愛盈因為企喺角落頭位，所以比人迫到痴埋咗一齊，身貼身。

本來我哋仲係度傾緊計，但係之後十分鐘嘅車程我哋都保持住呢個動作一粒聲都無出過。

落車果陣我哋兩個仲要紅都面曬，成隻返茄咁，而且我果陣先發現我哋原来不約而同地着緊情侶裝，白衫黑褲同黑鞋，十足十一齊落街食飯嘅情侶，但係當愛盈發現我哋落車嘅地方之後，就即刻問我，

「點解我哋係度落車嘅？呢度唔係學校隔離咩？」



「因為我哋要去嘅地方就係前面。」

眼前，係一間小餐廳，呢一間小餐廳係教練嘅老婆同佢一齊開嘅，所以可以話係佢嘅副業。

以前每次我哋籃球隊打完比賽之後，都會十二個人加埋教練一齊嚟呢度食野，通常都係由我，教練，同教練嘅老婆迎映姐一齊煮嘢食俾大家，每次都係齊齊整整十四個人圍埋一齊食飯一齊傾計，嗰段時光...其實都幾開心，但係至從離開咗籃球隊之後，我就再無嚟過呢度，因為我驚...佢哋會討厭我。

之後愛盈就同我一齊入去，打開門之後，眼前淨係得教練同迎映姐係到，

「希哥！你果然仲係咁準時喎！快啲過嚟幫手炒埋碟菜佢就得喇，佢哋班友仔頭先話咩隔離個街場有女就衝晒過去」，教練燦笑道。



「...好。」，我呆一呆，然後回答。

之後我就拎咗張凳畀愛盈坐低跟住入廚房幫手，炒緊菜嗰陣我忍唔住問教練，

「其實你哋嬲唔嬲我...咁樣突然走咗去，辜負曬你哋對我嘅期望...」

「傻啦，無人會嬲你架，我哋反而更多謝你，比機會我哋去吸收挫敗，你都唔好再自責喇，你已經付出得夠多架喇，努力咗咁耐，係時候要休息，希。」

「教練...多謝。」



「好喇！搞掂喇！拎啲餸出去之後就call佢哋返嚟啦！」

「好。」

我笑住講，因為我覺得...好溫暖...

出到去之後，我見到迎映姐同愛盈傾緊計，

「希哥有眼光喎，個女朋友仔又乖又可愛。」，迎映姐舉起手指公。

正當我哋兩個唔知點解釋果陣，阿峰佢哋返咗嚟，

「喂阿希！啱啱拎到個靚女嘅ig呀，晏啲send比你呀，咦？果個女仔邊個嚟架？」，阿峰詫異咁望住黃愛盈。

「人哋女朋友仔呀～」，迎映姐笑道。



佢哋聽到之後全部一齊嗌：

「希哥出pool喇！！！飲爆佢呀！！！」

我哋籃球隊有個優良嘅傳統...就係邊個出pool就要自己灌半打啤酒...

結果嗰一晚雖然我係咁解釋...但係最後都係比人灌咗半打啤酒，雖然無醉到，但係第二日都係頭痛到請咗假...（都係有準時叫醒黃愛盈）