《突然有條女同我同居》(冇甜): 序

今日係暑假之前嘅最後一日,我瞓完個所謂嘅結業禮之後,就比人迫咗去影咗幾幅相,用啲自己都覺得好假嘅微笑應酬完佢地之後,就自己準備番屋企。

正當我以為今日又係一日無聊嘅一日,諗住返去自己打下波睇下書嗰陣。

我喺等車嘅時候突然收到一個電話,係老母打嚟：

「喂？阿希呀？你老豆今朝突然死鬼咗呀,你快啲番黎先啦,我有啲重要野要同你講呀」

「哦。」



相信好多人聽到呢種消息之後都會好驚訝或者...傷心?但係我由小學開始就已經對自己老豆一啲感情都無,更何況係所謂嘅愛。

而我老母亦喺嗰陣同我講咗佢地已經離咗婚三年嘅事實,仲讀緊小學嘅我完全無唔開心,反而仲覺得...有啲開心。

我而家都一樣,完全無任何嘅情緒波動,雖然由細到大我都同老豆一齊瞓,但我成世人根本就冇感受過父愛呢樣嘢,佢亦都無展現過任何關心俾我。

講咗咁耐我都唔記得介紹自己...我個名叫葉正希,一個好普通嘅名。

準備升中3,身高175,個樣都算話係中上, 性格比較內向,最討厭人多嘅地方,但成日有女仔嚟搵我。



我喺學校朋友唔多,屋企就有個四十歲但係個樣望落得廿五歲嘅老母,仲有個細佬,之後老豆就啱啱走咗,如無意外就係因為肺癌。

我返到屋企之後,老母就同我講佢用咗老豆嘅遺產係附近買個五,六百呎嘅單位。

我都係而家先知原來老豆儲咗咁多錢,竟然可以買到呢啲私人住宅,但係我問咗老母之後先知,原來佢係同佢嘅fd一齊買嘅,話係想我同佢個fd個女一齊住...

我平時唔會主動溝女,一向都係順其自然,感覺啱就可以,所以從來無拍過拖,希望嗰個女仔唔好係啲性格惡劣嘅公主病。

傾咗一陣之後,我決定八月尾就會搬入去,而且老母話嗰個女仔同我同一間學校,好似仲要係同級。



雖然突然搬出去有小小突然,但係辛苦咗老母咁多年,都係時候要俾佢放鬆一下,而且佢係出面仲有兩個舖位租比人,所以生活都唔成問題。

話咁快打下波又忙下就到咗八月尾,我都執好曬啲野準備好,終於喺24號嘅夜晚搬到入去,間屋都唔錯...啲顏色都配搭得好舒服,而且仲係三房一廳。

好快我都搞掂曬啲野,而時間亦都黎到8月31號嘅夜晚...嗰個女仔到底幾時會嚟?

正當我抄考完所有暑期作業嘅時候之後,已經九點幾。

喺我去完個廁所之後,我聽到突然有人㩒門鐘。

...係嗰個女仔？但佢應該有鎖匙,所以我認為係半個鐘前嗌嘅外賣,我喺銀包拎咗張五十蚊,諗住開門跟住比錢果陣...