《毒L和初戀相識的日子》: 第一百九十章 請假

第一百九十章 請假

突然，Zoe嘅電話響起，佢接聽咗個電話。我留意佢講嘢嘅內容，估計應該係David喺日本打比佢。

佢哋傾咗半個鐘多啲，成間cafe就得番我同埋Zoe一枱客。

「係David打比我呀。」Zoe收線之後向我講。

我嘅推測果然冇錯。





「都估倒啦。係喎，妳啱啱又話有嘢同我講嘅？」我問。

「係喎。我想講啲咩呢，唔記得咗添......」

「唔記得就算啦。咁我哋走喇，廢事阻住人哋收工。」

「好啦。件事應該唔係啲咩重要嘢嚟~」

我哋向Winnie個朋友的家姐講咗聲之後就走喇。





落到樓下，我哋行去搭車番屋企。喺分開之前，佢都仲未記得原本想同我講啲咩。

兩個星期之後，阿Paul、晴晴約我去佢哋學校間canteen食嘢，順便去參觀吓。

我專登拎咗日no pay leave。自從番咗呢份工之後，我都冇乜點請過假。

到咗戈日，我哋約咗朝早十一點喺又一城間Apple Store出面等。我到咗之後離遠已經見倒佢哋。

「早晨呀，Joseph哥。」阿Paul向我講。





「早晨。」我回應。

「都有兩個星期冇見喇喎。」阿Paul回應。

「你哋今日洗唔洗上堂？」我問。

「要呀，一陣三點半有堂上。」晴晴回應。

我哋經商場入面嘅隧道行入校園。佢哋帶咗我去AC2 Canteen。

去到人唔算太多，因為都未到放lunch嘅時間。我同阿Paul出去睇吓餐牌，而晴晴就搵位坐低。

「有乜推介呀？」我問。

「呢度啲款式多過I大好多，你揀吓先啦。」阿Paul回應。





比起I大嘅頹飯，呢度真係多好多選擇，而且價錢都算相宜。最後我揀咗呢度好有人氣嘅食物，脆炸原條魚柳包。之前上網都曾經睇過有人極力推介。

我哋坐低食嘢，呢個時候開始多人喇。

喺食嘢嘅途中，突然有一個人拎住餐盤行過嚟講:「Hello晴晴。介唔介意我坐低呀？」




我同戈個人素未謀面。