《毒L和初戀相識的日子》: 第一百八十章 神秘人物

第一百八十章 神秘人物

張相係Winnie着住一件粉紅色連身裙，感覺都幾高貴吓，好似去飲宴着嘅服裝。

佢仲錄咗段音比我:「件衫你覺得點？今日去買㗎~」

我最怕比佢問呢啲問題，因為我都唔知點答，同埋廢事答錯嘢。不過，我點都要答啲嘢嘅。

我回覆:「幾適合妳吖~ 做咩買新衫嘅~？」





Winnie之後話佢阿姨個仔下星期結婚，所以要買件衫去出席婚禮。

我叫佢到時要影多啲靚相比我睇，佢當然即刻就應承我啦。

我番到屋企之後，已經到夜晚喇，我當然又再打機啦。

過咗幾日之後，同樣又再係番工嘅日子。我今日早咗少少到達公司。

阿倫辭職走咗幾日之後，我都好似仲有啲唔慣，畢竟由實習開始就跟住佢做嘢了。





暫時仲未有人頂替佢個位，都係靠大家去分擔工作。

主管雖然話過會增加人手，不過都唔知等到幾時喇，好彩大家都應付倒依家嘅工作量。

除咗阿倫之外，我喺部門入面另外一個較相熟嘅同事叫阿輝，因為大家都有打開機，都幾傾得埋。佢年紀大我五年多啲，都仲算係後生。

佢做嘢都算幾快手，亦都好少會出錯。我實習戈陣佢都有教過我做嘢。

之前同佢傾計，得知原來比佢細三年嘅細佬都喺呢間公司做嘢，不過唔係同部門。





喺上晝做嘢嘅途中，家怡突然嚟搵我，揮手示意叫我出去。

我暫時停下工作，行出去搵佢。

「做咩呀？」我問。

「Hey Joseph，一陣一齊去附近戈間茶記食lunch好唔好？」家怡問。

我聽完之後覺得有啲奇怪，番咗咁耐工佢都好似冇搵過我食飯。

「好呀。咁公司地下等？」我回應。

「好呀，到時我會介紹一個人比你識。」家怡笑笑口地回應。

「邊個呀？」





「Well，到時你就知~」




雖然佢講到好似好神秘咁，不過我已經大概估倒係咩事喇。