《毒L和初戀相識的日子》: 第一百七十九章 久違的電影(下)

第一百七十九章 久違的電影(下)

套戲嘅內容係講一位性格好「毒」嘅「叔叔」寄居喺佢哥哥屋企，每星期只係番一日去大學做哲學科嘅代課老師。其餘時間佢多數留喺屋企，特別中意留喺間房入面。

佢姪仔雪男係小學生，有一日學校比咗份寫作功課佢，題目係「我身邊的大人」。佢決定以叔叔為主角去寫呢篇文，後來篇文獲得老師讚賞，並獲選參加全國比賽。

後來，「叔叔」遇見了一見鍾情嘅女神，Elly。不過，佢即將要離開日本，番夏威夷繼承咖啡莊園。「叔叔」之後決定要飛去夏威夷搵Elly，不過佢冇錢買機票。

咁啱雪男篇文贏咗全國比賽，獎品係夏威夷旅行，於是「叔叔」同埋雪男一齊飛去夏威夷搵Elly。





「Joseph哥，你可以學吓套戲個主角咁喎~」阿Paul喺影緊片尾戈陣向我講。

「係囉，有得諗喎~」晴晴回應。

「你哋咪玩啦...」我無奈地回應。

「你冇諗過飛過去搵人咩？」阿Paul問。

我考慮咗一陣，決定唔答佢呢個問題。戲院內嘅人亦都走得七七八八。





「唔好講呢啲啦，起身行囉。」我回應。

其實我都曾經有諗過飛過去搵Winnie，不過始終都冇去做到。因為我覺得去到見幾面又要再分開，感覺會好難受，對我、對佢都係。

經過戈次離別之後，我過咗好長時間先慢慢地開始習慣。好彩嘅係，佢選擇同我用呢種方式繼續喺埋一齊，而冇選擇放棄。

雖然仲未知道仲有幾耐先可以同佢見面，或者仲有冇咁嘅機會，不過只要可以同佢保持聯絡我已經滿足喇。

睇完戲之後，我哋落番去地下。





阿Paul同晴晴話要去附近行吓，我都好識做，唔留低做佢哋嘅電燈膽。

「咁我走喇喎。」我向佢哋講。

「好啦，記得下個禮拜六同我哋食飯呀，Joseph哥。」阿Paul回應。

「知喇，再電聯啦。」我回應。

就係咁，星期六嘅下晝就出去睇咗呢套戲，都算係幾好睇嘅一套戲。

喺番屋企搭車嘅途中，我睇電話發現Winnie用Whatsapp send咗張相比我。








唔知係咩相呢？