《毒L和初戀相識的日子》: 第一百七十四章 製造空間

第一百七十四章 製造空間

阿俊去咗開門，一睇原來係送pizza同埋炸雞嚟嘅外賣員。佢比錢之後，就拎入嚟。

「Jenny仲有幾耐到呀？」David問。

「應該就快到掛。」阿俊回應。

食物到咗，我哋都唔打牌住喇。我哋改為一邊睇電視，一邊等埋Jenny嚟先開餐。大約十五分鐘之後，門鐘再次響起:「叮噹叮噹」





「等我去開吖。」阿俊再次主動地提出。

今次開門見倒嘅終於係Jenny喇，阿俊見倒佢都即刻露出笑容。

「我哋食嘢先啦~」David對大家講。

枱上有一個pizza大批、幾件炸雞、焗飯以及焗意粉各一盒同埋幾罐可樂。

好耐都冇試過叫pizza食喇，最深刻戈次係啱啱番I大戈陣，梁sir請食嘅戈餐開sem飯。





至於自己整嘅pizza，試過一次非常難忘嘅經歷，就係戈次去塔門野餐，同Winnie合作一齊整。

到我哋差唔多食完戈陣，David好識做咁叫我同Zoe迴避吓。

「Zoe，妳咪話有啲嘢比Joseph睇嘅，我哋入妳間房睇吖。」David向我同Zoe講。

當然，我即刻就知道佢係想製造空間比阿俊同埋Jenny。

我哋三個好識做咁行開咗，入去Zoe間房，並將房門關上。





「希望佢哋可以傾掂佢啦。」我講。

「應該可以嘅，Jenny都肯上嚟。」David回應。

之後，David坐咗喺床邊玩電話，而Zoe就拎出一本相簿比我睇。

「係我同Winnie中學時期嘅相，你可以睇吓~」Zoe向我講。

「好呀~」我回應。

我打開相簿，主要係「即影即有」嘅相為主。入面絕大部份都係Zoe嘅相，當中唔少都有Winnie份。

我好投入咁去睇，發覺相入面Winnie個樣同依家都冇太大嘅分別，只係依加成熟咗啦。而呢本相簿令我最深刻嘅一張相，就係Winnie嘅一張獨照。佢紮起辮，臉上展現出微笑，着住校服，右手舉起V字手勢，背景係學校門前。呢張相正正就可以睇倒佢可愛嘅一面。

聽Zoe講，原來呢張相係佢哋中學last day影嘅。Winnie當日對於佢終於畢業感到好開心。





「Joseph呀，其實我收倒少少風，係關於Winnie嘅。你想唔想聽？」Zoe向我講。

「好呀，妳講嚟聽吓。」我回應。






Zoe究竟收倒咩風呢，搞到我有啲緊張。