《毒L和初戀相識的日子》: 第一百六十三章 突然的通話

第一百六十三章 突然的通話

我呢一刻嘅心情非常焦急，一直望住部電話等佢回覆。喺等待嘅途中，阿Paul突然打比我。

(妳要離開 我知道很簡單 妳說依賴...) 我部電話響起。

「喂，Joseph哥呀？」阿Paul講。

「做咩打嚟嘅？」我回應。





「冇呀，我想知你同Winnie搞成點姐，聽晴晴講你好似做咗啲嘢整嬲咗人喎。」

「唉，我都唔知同Winnie點呀。佢喺咁遠，如果佢唔覆我機，都冇辦法搵倒佢，唔通飛過英國搵佢咩......」

「咁你哋點解會搞成咁㗎，晴晴講啲又唔講啲。」

「是咁的，一個星期之前公司有個新同事嚟咗我做嘢個部門，女仔嚟嘅，我負責教佢做嘢。第一日佢提出話一齊食飯，因為唔熟路，咁我就應承咗佢。」

「跟住呢？」





「點知食飯戈陣，喺同一間茶記入面見倒家怡，我見倒佢同佢部門嘅一個男仔食飯，佢同樣見倒我。之後同日晴晴好快知呢件事，我估Winnie都已經知。」

「咁你有冇同Winnie講吖？」

「老實講，我覺得同一個公司女同事食飯唔需要交代囉。」

「我都認同嘅，不過啲女人就係咁㗎喇。咁之後呢？」

「之後有一日約咗佢Skype傾計，但係我等咗好耐佢都冇online，之後我就瞓咗。第二朝打番比佢，佢話已經知我同公司戈個女仔行得好埋之類喎，講完戈次之後電話佢冇覆過我機。」





「咁你諗住點？洗唔洗同你出嚟飲吓酒、傾吓計？」

「啱啱拍咗段道歉片段比佢，睇吓佢有冇反應啦。同埋，我勸你都係唔好成日飲酒喇。」

「其實我都覺得真係好少事姐，係佢敏感咗啲姐。」

「我差唔多瞓喇，遲啲再傾啦。」

「咁好啦，講到呢度啦，遲啲約出嚟食飯啦，拜拜。」

「拜拜。」

收線之後，我發現Winnie已經send咗兩段信息比我。唔知內容係啲咩呢......？

電話顯示:「來自Winnie的2個信息」







今日係I大last day之後，第一次同阿Paul吹咗咁耐水。