《毒L和初戀相識的日子》: 第一百四十九章 相聚

第一百四十九章 相聚

實習嘅公司收六點鐘。今日收工之後，我搭車出去Poly U搵Leo食飯。

我喺紅磡火車站沿行人天橋行過去，離遠已經見倒佢企喺度等緊我。

「去邊度食嘢呀？」我問。

「跟住嚟啦。」Leo回應。





佢帶咗我去一間位於Poly U入面嘅西式餐廳，名稱叫Theatre Lounge。

雖然餐廳門口寫住只招待學生與學校職員，不過其實係冇人查身份嘅。

入面嘅環境同一間正宗嘅西式餐廳冇乜分別，昏暗嘅燈光、寧靜嘅環境。如果Winnie仲喺香港，我一定會帶佢嚟。

我哋搵咗張枱，之後坐低。餐廳嘅客人並不多，可能係因為冇乜人知呢個地方。

望望餐牌，發現價錢都唔係太貴。一份晚餐幾十蚊就食倒。





我哋各自點完餐之後，就開始傾吓計。

「上次出嚟倒數戈日都冇問你添，你同你女朋友最近點呀？」Leo問。

「最近都係咁囉，同佢Skype傾計同埋每日都有keep住Whatsapp囉。」我回應。

「咁咪幾好囉。依家好多情侶都要分隔兩地㗎啦，我睇好你哋㗎。」

「多謝。咁你呢？你同你女朋友最近又點？」我反問。





「唉，最近同佢幾乎日日都見面。一陣又要送佢番屋企，佢依家喺上面同人做緊project。」

「你哋O day識到依家，都差唔多年半喇喎。」

「係呀，時間過得好快。」

「有得見人哋就要珍惜喇，唔係每對情侶都可以幾乎日日見面㗎。」

「係嘅係嘅。轉個話題先，最近……」

之後我哋都係傾一啲打機嘅話題。食完嘢之後，佢上番去搵佢女朋友，而我就行去搭車走。

喺搭車番去嘅中途，Winnie搵我話開Skype，我同佢講番到去之後搵佢。












慢慢地開始習慣了。