《毒L和初戀相識的日子》: 第一百零三章 建造城市(上)

第一百零三章 建造城市(上)

今日係星期五，上晝係一科主科堂，而下畫係上全人堂。今日嘅全人堂會玩一個大型遊戲，大家都好期待。

朝早嘅堂好悶，我同Winnie遲咗半粒鐘先番到，入到課室都係坐窗邊最後排嘅二人位。

「唔知一陣全人堂玩咩遊戲呢~？」坐前面嘅家怡喺放break戈陣問。

「應該都係類似之前戈啲啦~」同樣坐前面嘅Christy回應。





「我諗都係喇。」Winnie回應。

「一陣好似唔係課室上堂？」家怡問。

「係呀，改咗落地下間活動房。」Winnie回應。

今日全人堂嘅地點係地下面積較大嘅活動房，唔再係課室。

幾經辛苦，終於夠鐘落堂。我地去食完lunch之後，去咗地下戈間活動房出面等。Billy sir都好準時到。佢示意我地全班入去。





「大家好呀，又係我Billy sir。咁喺玩遊戲之前，如果大家有proposal交就交咗先啦，未有嘅deadline係五點半。大家五點半之前放去我個功課箱度，如果依家交得就交出嚟先啦。」Billy sir對全班講。

晴晴將我地組戈份proposal交咗出去。

「ok！咁上堂講過今日會玩一個大型遊戲啦，而呢個遊戲係叫做建造城市。咁首先要選兩位市長出嚟。有冇人願意做㗎？」

「兩個班長做啦！」阿Paul突然叫出嚟。

「係囉！」晴晴和應。





跟住其他人都開始起哄。

「咁麻煩兩位出嚟吖。」

我同Winnie你眼望我眼，喺度微笑。我地出咗去，Billy sir就比咗兩個對講機我地，之後單獨教我地點玩呢個遊戲。

「呢個遊戲分為市長、地盤主管同埋工人三個角色。咁你地嘅角色係市長啦，係負責同地盤主管溝通，去建造好呢個城市。」

「一陣佢地會分為兩組，每組嘅地盤主管會有一張地圖，而你地市長都會有一張地圖。地盤主管同埋市長嘅地圖係有地方唔一樣嘅，係以市長地圖作準。」

「市長地圖已經放咗喺121號班房，一陣地盤主管會用對講機聯絡你地。佢地會問地圖嘅嘢，而你地就要負責答佢地問題。」

「咁地盤主管主要係監督工人做嘢同埋聯絡市長，而工人當然就係留喺度去建造呢個城市啦。男班長係A組市長，女班長係B組市長。最後嘅完成品邊組同市長地圖最似嘅就贏。你地兩個有冇問題？」

我同Winnie都搖頭。





「咁你地依家拎埋對講機上121課室啦，一陣到最後我會call番你地落嚟。」







感覺呢個係一個幾有趣嘅團體遊戲。