《毒L和初戀相識的日子》: 第六十四章 慶祝生日(二)

第六十四章 慶祝生日(二)

喺大家都好投入咁玩緊嘅時候，我諗番起上個月某日約咗同阿Paul、晴晴傾計嘅內容。

---11月9日---
---大埔某cafe---

當日我去咗大埔搵佢地，目的係請教佢地，我煩惱緊嘅感情問題。當日同佢地喺cafe都傾咗好耐。

「拿，我諗倒個辦法幫你，得唔得要睇你自己。」晴晴同我講。





究竟係咩方法呢？

「咩辦法？」我問晴晴。

「下個月Winnie生日，你諗住點同佢慶祝生日未阿？」晴晴問我。

身為毒L嘅我又點會咁醒，識得諗定方法吖。

「Er....」我搖着頭。





阿Paul睇倒，都嘆了一口氣並搖着頭。

「唉，橋都幫你諗埋喇。去屯門戈間Party Room啦，之前我個朋友去過，幾好㗎。」晴晴講。

「你叫一大班人去，之後喺中途同佢表白，我相信Winnie一定會覺得好surprise同埋會接受。」晴晴補充。

「係呀，你地兩個人，就係差一步㗎咋。明明兩個都中意對方。」阿Paul講。

我點頭回應。





「至於點樣表白呢，就唔該你自己諗喇！」晴晴對我講。

「加油啦，Joseph哥！」阿Paul講。

「真係可以咩？但係喺咁多人面前表白，我淆底㗎喎。」我回應。

「頂你，唔通要Winnie開口咩？」阿Paul講。

「就係如果你有呢份勇氣，Winnie會覺得你好勇敢，自然會心動。加上佢都知你中意佢啦。」晴晴回應。

「喺咁多人面前咁做，佢會唔會唔中意㗎？」我問。

「之前同佢傾過計，佢話覺得咁樣好浪漫。」晴晴講。





「總之，你有一個月時間諗吓點樣同人講。最好自己練習吓先啦。」晴晴補充。

「好啦。多謝你地。」我回應。

「你有疑問就再搵我地啦，Joseph哥！」阿Paul講。

「知道喇。」我點頭回應。

---12月10日---
---屯門某Party Room---

大家都玩得好開心。晴晴同阿Paul燒咗啲嘢食比我地，我聞倒D味都覺得香，亦都諗起好耐冇試過喺郊外燒嘢食。

突然，晴晴喺雪櫃拎咗個生日蛋糕出嚟。原來戈袋嘢係生日蛋糕。





「大家嚟幫Winnie唱生日歌同埋切蛋糕先啦。」晴晴拎住枝咪同大家講。

大家都過咗嚟張大枱到，個蛋糕中間點咗一枝蠟燭。

「Joseph帶住我地唱吖。」晴晴遞咗枝咪比我，並向我打咗一吓眼色。而阿Paul都向我做咗幾吓加油嘅手勢。

Winnie坐咗喺蛋糕前。而我地就圍住張枱企。大家嘅眼光都注視喺我度。




時機到了。