《毒L和初戀相識的日子》: 第五十一章 糖黐豆

第五十一章 糖黐豆

我諗咗一陣，最後決定咁答。

「我諗我會同佢講出自己嘅心意，因為唔講嘅話就可能冇機會再講。仲有可能會試吓挽留佢喺度。」

「原來係咁。其實都冇乜標準答案嘅，係我想睇吓你點答姐。」Winnie回應。

時間仲早，Winnie話想落街行吓。





「我同Zoe約咗七點，不過我想落去行吓。」Winnie同我講。

「好阿，咁妳落去換番衫先？」

「嗯。不如一齊落去？比你參觀吓我屋企喇。」

其實我唔太想落去，不過Winnie叫到又唔好意思拒絕。

「好呀。」我回應。





我地沿樓梯行落一層，就去到Winnie屋企。開門一入去，其實個格局同我間屋都冇分別。

「我換件衫先，你喺廳等我一陣啦。」Winnie同我講。

「好。」

我喺廳四圍望，見倒一張應該係Winnie小學戈時影嘅相。我細心睇，原來Winnie細個戈時已經咁靚。

我再仔細望吓，心入面有少少印象，我好似見過細個嘅Winnie。不過都正常嘅，住埋同一幢樓好易撞倒。





大約半粒鐘之後Winnie終於出嚟。

「行得喇。男班長，你唔會嫌我耐掛？」

Winnie換上一件黑色T-shirt同埋一條長牛仔褲，仲有化咗妝。

「點會吖，行喇。」

我地落到樓下商場，一如所料，超多大陸自由行旅客，寸步難行。

「一係去屯門公園行吓？」我向Winnie提議。

「嗯，好阿。」Winnie回應。

行到去屯門公園，雖然人流冇咁多，不過都有班大媽喺度唱歌跳舞。





「佢地好嘈呀。」Winnie講。

「係囉，污染哂成個公園...」我回應。

我同Winnie行到去屯門河邊嘅單車徑。

「男班長你成日喺呢度跑步㗎？」Winnie問我。

「係呀，聽住歌咁跑，做吓運動囉。」

「搵日嚟撞吓你先。」Winnie笑笑口咁講。

之後我地行到去西鐵站個地下，時間亦都嚟到六點半。





「差唔多喇，我地去同Zoe會合喇。」Winnie同我講。

「嗯。」

我地去咗V city入面間一田，等咗一陣就見倒Zoe。

「Winnie 哈囉。咦，終於一齊咗喇？」Zoe對我地講。

「妳唔好玩人啦。」Winnie啤咗一啤Zoe。

「行囉，我地去食嘢喇。」Zoe話。

「食咩？」Winnie問。

「我冇所謂呀，Winnie男朋友想呢？」Zoe回應。





Winnie喺度笑我。

「咩男朋友呀... Winnie話事啦。」我回應。

「食薩利亞囉，好唔好吖？」Winnie回應。

「好阿。」

我地行去雅都商場間薩利亞，期間佢地兩個傾計，而我就冇乜點出聲。到咗之後等咗陣位就入座同埋叫嘢食。

「Winnie呀，其實今日出嚟係想同妳道歉，琴日件事對唔住呀。」Zoe同Winnie講。

「算啦，都唔關妳事嘅。」Winnie回應。





「好彩有人照顧住妳，我先冇咁擔心。」Zoe望住我講。

「咁男班長住我樓上咋嘛，咪照顧吓我囉。」Winnie回應。

「你兩個糖黐豆咁，我睇好你地㗎。有好消息要同我講呀。」Zoe回應。

「唔好講呢啲啦，係呢，妳上次咪話...」Winnie轉移話題。

其實諗深一層，我同Winnie真係糖黐豆咁。喺讀咗I大之後，就幾乎日日都見倒佢，一齊番放學、食飯等等。

食完飯之後，我同Winnie送咗Zoe番去，佢住景峰花園。之後我地行番屋企，再喺地下大堂分開。 今次係我有Lift先。

「男班長，聽日見喇。我放咗啲嘢喺你電腦枱張滑鼠墊下面，你記得擺嚟睇吓。」

「好啦，拜拜喇。」

我關上Lift門，並且期待緊Winnie放咗啲咩比我。






「Whatsapp中收到你鬼臉
極幼稚但陪妳瘋癲」