[愛情走糖故]兩個人心底中不為人知嘅秘密,成為兩個人間嘅牽引: 129.他又受傷了

「佢唔會有事㗎可…」夏巧莘望住手機嘅螢幕
「叮噹叮噹～叮噹叮噹～」
學校嘅鐘聲剛好響起，到咗早會嘅時候
夏巧莘將手機放入裙袋中，拎起校褸踏出課室
經過隔離班嘅課室時，夏巧莘下意識就抬頭往課室內望入去，自然地尋找屬於凌御生嘅書包
「佢…仲未番嚟呀…？」夏巧莘望住凌御生嘅座位，枱面上冇書包，夏巧莘嘅心中又再多添一份失落感，「唔通佢今日真係唔番？」
全個早會夏巧莘都明顯地心不在焉，霎眼望向遲到隊，見到劉子勤…身後嘅凌御生
夏巧莘嘅心中開心咗一下，但轉眼又皺起眉頭
「佢做咩又受傷啦！？」夏巧莘喺心中緊張地道
喺夏巧莘企嘅位置都可以見到凌御生嘅臉頰上有一塊一塊明顯嘅瘀青，眼角、嘴角、臉頰上全是瘀青




「又同人打架啦？」夏巧莘完全聽唔到喺台上分享嘅同學講緊咩，眼中只有又唔知點解受咗傷嘅凌御生，心中默默擔心着
凌御生雙手插住褲袋，目無表情咁企喺遲到隊，感覺就好似一個冷酷高冷嘅富家公子一樣
早會完結嘅時候，遲到隊嘅人被記錄一下名，然後都跟住班級嘅隊尾番上課室
上到3樓嘅時候，凌御生冇跟住班入課室，反而繼續上樓梯
夏巧莘見到凌御生繼續往上行，凌御生剛好行到3樓同4樓之間嘅平台往下望，同夏巧莘對上了視線
凌御生微微揚起嘴角，唔留意真係唔會睇得出佢有揚起嘴角，似笑非笑，然後就繼續行上去
夏巧莘番到班房，心中始終有啲擔心凌御生，喺呢個時候，夏巧莘感覺到放喺裙袋嘅手機震咗一下
夏巧莘拎出手機，見到凌御生喺whatsapp發咗個訊息比佢
Aaron BB：見你就好
夏巧莘睇到，心都動咗一下，然後即刻就著起校褸外套，將手機放番入裙袋




「嘉怡，我有啲肚痛，去一去廁所…」夏巧莘細聲咁同嘉怡講完就匆匆忙忙咁離開課室
夏巧莘帶着急促嘅步伐踏上樓梯，上到天台打開天台嘅門，但係卻見唔到凌御生嘅身影
夏巧莘向長櫈走咗兩步，凌御生突然喺一邊行出嚟從後攬住夏巧莘
「呀！」夏巧莘比凌御生突然行出嚟同動作嚇到嗌咗出嚟，但瞬間就用手掩住口收咗聲，「你嚇死我啦！」
凌御生鬆咗手，夏巧莘轉身望向凌御生，呢一次先完全見到凌御生臉上嘅傷
「你塊面做咩又瘀晒㗎？」夏巧莘心疼地伸手輕撫凌御生嘅臉頰，輕皺起眉頭
凌御生搖搖頭，手搭喺夏巧莘嘅手上輕輕握緊
「噓…唔好問。」凌御生將額頭貼上夏巧莘嘅額，合起雙眼柔聲道
夏巧莘聽到凌御生咁講之後亦冇再追問，但係依舊心疼
夏巧莘輕輕推開凌御生，仔細地望住凌御生臉上嘅傷痕




「到底咩事啦…？」夏巧莘柔聲問道，但凌御生只係搖搖頭
夏巧莘突然記起啱啱喺遲到隊，企喺凌御生前面嘅係劉子勤，唔通佢兩個又打架啦？
「你同劉子勤又打架啦？」夏巧莘皺起眉頭，心中既擔心又不悅
「唔係，今次係我自己整親。」凌御生否認咗，但卻講咗一個夏巧莘根本冇可能相信嘅借口
「你自己整親？」夏巧莘挑一挑眉，「你要點撞先可以撞到瘀晒…」
「唔好理。」凌御生冷冷地拋出一句同時行開走向長櫈
夏巧莘望住凌御生行開嘅背影，心中既心疼又難受
佢明白凌御生有自己嘅秘密，有唔想比佢知嘅事，但係佢冇辦法唔擔心呢個男仔，因為呢個男仔係佢中意嘅人
眼見佢明顯係有事隱瞞，但又唔可以問多，心入面特別煩躁
「凌御生！」夏巧莘輕輕握緊了拳，開口嗌道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link