[愛情走糖故]兩個人心底中不為人知嘅秘密,成為兩個人間嘅牽引: 119.遍體麟傷

阿年向前踏一步，俯身向前，想再用小刀𠝹向凌御生，但呢一刀比凌天傲一手推開咗
「生，做你應該做嘅嘢！」凌天傲帶着命令嘅語氣道
凌御生冇猶疑就往旁邊鐵皮屋嘅門衝去
阿津同其他兄弟將阿年嘅手下攔住，毫不留情地將佢地打了一個落花流水
鍾家豪一下子將鐵皮屋嘅木門一腳踢開，凌御生衝咗入去，左望右望，但卻見唔到夏巧莘個人，視線自然地望向右邊嘅其中一個冇門嘅小房，諗都冇諗就跑咗入去
房中嘅女孩嘅模樣直打入凌御生心房，夏巧莘側身瞓喺地上，喺雙腿嘅腳踝上被綁上了麻繩，小腿上全是血痕同血跡，雙手被反綁喺身後，早就已經不省人事
凌御生大步邁向夏巧莘，輕力抱起夏巧莘，夏巧莘無力地靠喺凌御生嘅胸膛上
凌御生真係慌了…心慌了…紅了眼眶
「家姐！」跟喺後面嘅夏學謙都見到夏巧莘，頓時走到夏巧莘嘅身旁
「你仲等咩呀！快啲送佢去醫院先啦！」鍾家豪不忍直視夏巧莘呢個模樣便嗌道




今次係凌御生第二次…感覺到死神又要再喺佢身邊帶走一個人
心急死了…心痛死了…痛到好似滴緊血一樣…
望到夏巧莘腿上嘅傷痕，心臟頓時好似比人插咗一刀一樣揪着痛，痛得快要無法呼吸…
「阿年，你好想番入去坐係咪？」凌天傲輕輕皺起眉頭望住阿年，「我地係出生入死嘅好兄弟，你宜家竟然對我報仇？」
「出生入死嘅好兄弟…哼…」阿年冷笑一聲，完全唔怕凌天傲，向佢行前咗一步直視佢，「作為好兄弟，你咩都同我爭。社團大佬個位你要爭，女人你都要爭…」
「以前老大已經講過，邊個有能力就比邊個。而女人，係晴晴揀㗎，唔係我逼佢。」凌天傲對呢段兄弟情其實好珍惜，佢唔明白點解佢嘅好兄弟會係咁諗，又或者換個講法，佢宜家先知道原來佢嘅好兄弟一直都係咁諗佢
「你知我中意晴晴㗎，點解你仲要摻和落嚟？但唔緊要，係晴晴嘅選擇，你應承咗會好好保護佢，結果呢…結果呢！」阿年突然間大聲怒吼，喺屋入面嘅三人比突如其來嘅吼聲嚇咗一嚇
但係已經冇時間諗咁多，凌御生將夏巧莘一把抱起
「行，宜家就去醫院。」凌御生盡量保持冷靜講道
「行啦！」夏學謙著緊地行到門前拉開木門




「撐住呀夏巧莘…拜託你撐住…」凌御生喺心中默許
阿年見到佢地出嚟，但係冇阻止，只係冷冷一笑
鍾家豪跑向另外幾個手下駛嚟嘅車，上咗駕駛坐，夏學謙跟喺後面小跑
「生，你要睇住佢死，你要記住呢種後悔。」阿年冷笑道
凌御生停低，露出冷酷無情嘅表情回頭望向陪年，喺懾人嘅雙眸中有股令人由心而發嘅寒意，眼神有着令人生畏嘅感覺
「佢唔會死。但如果佢死咗，我要你陪葬！」冰冷嘅言詞喺凌御生口中講出嚟
凌御生一講完，就轉身再次大步的邁步走，走到去車門邊打開車門入去
宜家唯一要做嘅，係去醫院
「晴晴嘅死，已經係過去，係你太執著。」凌天傲冇多解釋，「津！帶佢番社團。」
阿年冇反抗，只係揚起嘴角，默默上咗車，跟佢地番社團




去醫院嘅路上，車中嘅氣氛格外沉重，冇人願意開口說話，夏學謙唔敢望去後座，因為夏巧莘嘅傷令佢心痛
喺凌御生懷中嘅女孩安靜得很，正在沉睡着
「夏巧莘，拜託你唔好死，你一定會冇事…」凌御生嘅手輕撫着夏巧莘嘅臉頰，佢心底嘅痛心已經冇辦法再隱瞞落去，眼眶慢慢泛紅
凌御生伸手捉住夏巧莘嘅手，愣了一愣，心中一顫，開口道：「鍾家豪…開快啲…！」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link