[愛情走糖故]兩個人心底中不為人知嘅秘密,成為兩個人間嘅牽引: 90.我們都一樣

喺社團嘅審問室中，一個男人坐着，雙手被綁喺椅背上，耷低頭不語
「邊個指使你？」阿津坐喺男人嘅另一邊，手上把玩嘅小刀，「講。」
「我係唔會出賣大佬。」男人目無表情咁講道
「真係口硬。你對佢嚟講算係啲咩啫？只係一個掩護嚟，你死咗佢都唔會可憐你，你咁樣做值得咩？」阿津嘅手搭喺椅背上
「我唔會出賣佢。」男人講道，「就算要死都唔會講。」
「唔講？對你有咩好處？」阿津輕輕一笑，「你咪又係佢嘅走狗。」
「哈哈…」男人笑咗一聲，「走狗？你咪一樣係凌天傲嘅走狗。我同你又有咩分別？我地，都係一樣。」
「唔好攞我嚟同你比。」阿津收起笑容，拎住小刀嘅手伸直，刀鋒直指男人，「我同你唔一樣。」
「唔一樣？有咩唔一樣？」男人反問道，「咪又係幫大佬做嘢。」
「你點解要嚟殺我大佬同傷害佢個仔？講！」阿津嘅耐性耗盡，直接就企起身，刀尖直指男人嘅喉嚨，兩者之間只差了0.1cm




喺凌御生屋企，凌天傲坐喺書房，開住枱燈，坐喺黑色嘅大班椅上，視線停留喺書枱上嘅相架
左邊係凌天傲嘅妻子晴晴，晴晴抱住年幼嘅凌御生，凌御生笑得特別燦爛，企喺右邊嘅凌天傲一手搭住晴晴嘅博頭，夫妻二人都笑起嚟，望住年幼嘅凌御生
凌天傲望住相架，右手摸着套喺左手無名指上嘅結婚戒指
凌御生瞓喺床上蓋着被，一直輾轉反側，無法入睡
由平瞓喺床上郁兩郁變咗側身瞓，再由側向左邊瞓一個大翻身側向右邊瞓，但無論點都瞓得唔舒服
「唧…」凌御生自己都覺得唔耐煩，最後都係側向左邊向住衣櫃
凌御生望住放喺床頭櫃上嘅Chip公仔，然後伸手開咗床頭燈，拎起Chip公仔到自己面前
「拜託你一定要安全…」凌御生對住Chip講，心中諗住夏巧莘，呢一刻嘅Chip就只係一個代表物
夏巧莘唔喺身邊，唯有望住Chip嚟睹物思人
「只要你安全就夠…」凌御生喺心中講道，然後靜咗咁望住手中嘅公仔




「咁唔搵女朋友咪得，直到你搵到男朋友。」
「我娶你。」
呢兩句說話喺凌御生嘅腦海中快速閃過
「嘻…你變咗啦凌御生…」凌御生微微揚起嘴角，「仲以為一世都唔會搵到中意嘅人…點知…嘻～」
喺仲咁年輕嘅時候講真愛，好似好難以置信
但本來都係咁諗，以為唔會遇到真愛嘅凌御生，喺遇上夏巧莘之後，夏巧莘完全成為咗佢嘅唯一
怕夏巧莘唔開心，傷心難過，只希望佢每一日都開開心心咁過，每一日都幸福快樂
遇上夏巧莘之後，終於知道咩叫「心動」同「心痛」；咩叫做「想令一個人幸福」；咩叫做「眼中只有她」
想要一直都小心翼翼咁保護佢，將佢捧喺手心，對佢嚟講，夏巧莘就係一件珍寶一樣
當逐漸發現更多喺呢個少女嘅「完美形象」下埋藏着一件又一件心事後，心中嘅保護欲更強，更想去保護呢個女仔嘅一切，為嘅就係佢嘅笑容




佢，只想成為佢嘅依靠…
凌御生輕輕錫咗Chip一下，然後自己尷尬咁笑
「你點解會做埋啲咁嘅嘢㗎…」凌御生尷尬地同自己講道
凌御生將Chip放番好喺床頭櫃上，然後閂上床頭燈
「晚安…」凌御生柔聲道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link