[愛情走糖故]兩個人心底中不為人知嘅秘密,成為兩個人間嘅牽引: 89.火速升溫

「暫時冇。」凌天傲搖搖頭，「阿津捉咗兩個番去審問緊，但仲未知道係邊個主使。」
「希望阿津快啲問到啲咩…」凌御生心中有啲擔心
凌天傲望住凌御生，忽然覺得自己個仔好似變咗，同以前嘅佢有啲唔一樣
講嘢嘅語氣溫和咗好多；笑嘅時候多咗；番到嚟嘅時候唔再係好似租客咁，兩父子終於有嘢可以講下，雖然有時凌御生嘅語氣仲係好強硬，講兩句就收聲，但係總好過一見面就嘈交
「做咩？」凌御生見凌天傲望住佢便問道
「冇…」凌天傲輕輕一笑，搖搖頭
另一邊廂，夏巧莘啱啱沖完涼出嚟，夏學謙就行入廚房洗嘢
「你最近有心事呀？」夏巧莘喺杯架上拎咗隻玻璃杯落嚟，打開雪櫃，拎出牛奶盒
「吓？唔係呀。」夏學謙望一望夏巧莘，然後又繼續洗碗
「唔係？你最近成日都心不在焉咁…」夏巧莘將牛奶倒入玻璃杯，然後扭番實個盒蓋，將牛奶放番入雪櫃




「唔係呀。你諗多咗啫。」夏學謙講道，「係咪你最近拍拖拍到傻咗呀？」
「冇拍拖呀…」夏巧莘低頭一笑
「你兩個行得咁埋都唔係拍拖呀？」夏學謙喺旁邊拎咗條抹碗布，將啱啱洗好嘅碗先抹一下
「曖昧啫～曖昧…」夏巧莘行咗出去
「曖昧？你上次成晚冇番，喺佢屋企過埋夜呀？」夏學謙將碗碟都放喺碗碟架上再吹乾，然後行出廳，「上次你唔係同佢去迪士尼咩？」
「你又知我係同佢去迪士尼？」夏巧莘拎住手機，心虛咁耷低頭睇手機
「要知有幾難？你番到嚟笑得咁開心，睇都睇得出啦！」夏學謙無奈地講道，坐低喺梳化上拎住電視遙控，「成晚冇番嚟，唔通瞓街呀？」
夏巧莘冇出聲，默默低頭睇手機
「你加油啦。」夏學謙突然講咗句，「中意咪去追囉，或者佢都中意你呢。」
「係掛…」夏巧莘猶疑地回答，但諗起啱啱喺樓下凌御生講嘅嘢，佢又偷偷笑起嚟




「你睇你呀，個樣冧到…」夏學謙無奈咁講道，「仲死口唔認…」
「煩呀你～」夏巧莘笑住咁講，企起身一蹦一跳咁行番入房
夏學謙無奈一笑，搖搖頭
夏巧莘坐低喺書枱前，喺書包中拎出筆記本同中文書，打算整理一下筆記
兩個人嘅關係火速升溫，兩顆心已經好靠近，只差在邊個先講出口表明心意
夏巧莘托住頭，根本就冇心情做筆記，腦海入面都係凌御生嘅身影
「嘻嘻～」夏巧莘托住頭，望住夾喺牆上網格嘅照片，望住嘅唔係上次去迪士尼影嘅相仲會係咩相？
夏巧莘將後來攝影師影嘅嗰張相都沖印咗出嚟，都夾埋喺架上，宜家一抬頭就望到
夏巧莘拎住筆，低頭喺筆記本上畫咗個心心，然後望住筆記本笑
腦海中一直諗起喺樓下同凌御生分別嘅時候嘅對話




「嗯…但如果有一日你有女朋友嘅話--」「咁唔搵女朋友咪得，直到你搵到男朋友。」
「咁如果我到咗30歲都冇--」「我娶你。」
夏巧莘正正係比凌御生呢種堅決而懾住，對夏巧莘而言，凌御生係一個好好嘅依靠，比到佢安心同安全感
偶爾會發現呢個男仔更多嘅Charm point，就算只係一件小事，都會令夏巧莘覺得好興奮好心動
只係諗一諗啱啱嘅對話，個心簡單甜到膩了

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link