[愛情走糖故]兩個人心底中不為人知嘅秘密,成為兩個人間嘅牽引: 67.全因為她，也只因為她

「你係真係咁中意夏巧莘嘅話咪去囉，又冇人阻止你嘅～」鍾家豪微笑道，輕輕捉緊拳頭遞到凌御生面前，「做兄弟嘅一定撐你。」
「嗯…」凌御生伸手同鍾家豪碰拳
「做兄弟嘅一定撐你。你係中意人嘅，咪鼓起勇氣去囉～」鍾家豪笑道，「你唔係話夏巧莘都中意你咩？我覺得佢就係嗰個幫你克服心理嘅人。」
「真係好咩…我如果喺一個正常嘅小康之家出世，可能一切都會唔同…」凌御生苦笑道
「佢知道你屋企背景？」鍾家豪問道
「我有同佢講過，但佢好似唔太震驚。」凌御生講道
「你怕佢介意？」鍾家豪輕皺眉頭，「我覺得佢唔會。」
「唔係呢個問題…佢琴晚話同我一齊就會好安心，佢好中意同我一齊，我當然知道唔係因為飲醉咗而亂講，因為從佢平日嘅表現都睇得出佢對我有意思，但係問題就在於…」凌御生苦惱咁撥撥頭髮，望住天花板皺眉頭，「在於我呀…」
「你唔洗擔心咁多其實。」鍾家豪講道，「我知你擔心啲咩。你諗下你有幾中意佢。」
「我淨係知道我對佢嘅感覺係從來都冇出現過喺其他人身上，佢真係第一個…令我咁心動嘅人，第一次因為女仔而面紅耳赤，心臟亂跳…」凌御生合埋眼，腦海中頓時就浮現出夏巧莘嘅背影，夏巧莘擰轉頭望佢，露出甜甜嘅笑容，「我中意佢或者係佢嘅與別不同，係喺我面前同喺其他人面前嘅分別，係真實嘅佢…主因唔係佢靚，唔係佢性格好。」




「你嘅改變，我睇到。」鍾家豪伸手搭住喺凌御生嘅博頭上，「你以前成日都唔番學，番到嚟又會走堂；但係宜家你日日都番嚟上堂聽書，走堂嘅次數都少咗。真係因為佢喺你身邊你先有咁樣嘅改變。」
「因為每日都會期待朝早上到巴士嘅時候見到夏巧莘…」凌御生露出淺淺嘅笑容
「嗰次劉子勤挑釁你，只係講咗一句你就即刻出手打佢，我嗰下真係呆咗，我完全冇諗到你會咁嬲，我都係第一次見你咁嬲。」鍾家豪諗起上次喺學校，凌御生出拳打劉子勤嘅事，「或者你由嗰陣開始，已經好在意校花。」
「我都估唔到我會出手打佢…」凌御生微微搖一搖頭，淺笑道，「嗰刻我咩都冇諗，淨係知道有鼓怒火喺心底湧出嚟，然後就出手打咗佢…」
凌御生自己諗番都覺得不可思議，嗰下咩都冇諗到，只係聽到劉子勤講夏巧莘嘅壞話，怒火就一下子湧出嚟，一下子就揮拳打劉子勤，完全冇任何嘅猶疑
「其實你比佢嘅魅力吸引住啦！」鍾家豪露出笑容，「咁佢又真係幾靚幾有佢嘅魅力嘅～人又靚，成績又好性格又好。」
凌御生冇出聲，只係瞪住鍾家豪
「我唔係中意佢囉…咁佢係校花，我都會覺得佢好靚，但我對佢唔係嗰種Feel囉！」鍾家豪即刻否認
「咁夏巧莘係幾可愛嘅～」凌御生心中甜絲絲的，「我唔否認。」
「你地曖昧都曖昧得衰過人。」鍾家豪講道，「曖昧到好似放晒閃咁，人地唔知仲以為你地真係情侶。」




「同佢一齊做咩都會變得好Sweet，好令人心動。」凌御生講道
「唉…得啦得啦～唔洗閃我啦～」鍾家豪嘆氣搖搖頭，「我地等到差唔多時間就過去啦～你諗下唱咩歌仲好啦！」
「嗯…」凌御生點點頭，「唱…《以後別做朋友》？定係唱《不許你注定一人》？又或者…唔知呀…」
要企喺舞台上，借唱歌同自己中意嘅人表白，到底係浪漫勇敢定係無膽當面講先揀呢個方法？
當時間去到4點半嘅時候，凌御生拎埋佢嘅結他同鍾家豪一齊去Band房匯合阿文同軒軒

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link