[愛情走糖故]兩個人心底中不為人知嘅秘密,成為兩個人間嘅牽引: 66.他的心事

從來都冇試過，心臟會咁樣緊縮，會咁樣加速跳動
夏巧莘就好似完成咗一項突破咁
自從遇上咗夏巧莘，呢顆心臟從來都冇穩定過，永遠都唔可以乖乖的，特別係見到夏巧莘嗰陣
放喺隔離嘅電話突然響起嚟，將凌御生嚇咗一跳，頓時坐起身撥一撥頭髮
「喂，比你嚇死啦鍾家豪…」凌御生一接起電話就講道，「咩事呀？」
「今日出嚟夾吓，不如。」鍾家豪講道，「難得阿文同軒軒都得閒。」
「喺邊度練？」凌御生企起身行入房，拎起放住木結他嘅結他袋
「你開門先啦。」鐘家豪一講，凌御生愣了愣，然後放低結他拎住電話行出房去到大門前開門，「Suprise！」
「你上嚟做咩…又話夾Band...」凌御生開咗道門之後就轉身行開行向梳化
「校花仲喺度咩？」鍾家豪閂上門，完全唔知死咁問道




「走咗啦。」凌御生淡淡地講道
「琴晚同人一齊就唔聽我電話…」鍾家豪坐喺梳化個博位上，「今朝又同人一齊…唔係喎～等陣先！」
鍾家豪覺得自己咁樣講怪怪地咁樣，突然就諗到啲令兩者串連起嚟嘅嘢
「你由琴晚到今朝都係同校花一齊呀？」鍾家豪又真係蠢唔晒，仲要一語中的
凌御生冇估到鍾家豪會一講就中，所以一時三刻比唔出反應，眼神偷偷迴避
「嘩～過埋夜喎～」鍾家豪撞一撞凌御生嘅博頭，「有冇咩咩咩呀？」
「你諗咩呀？梗係冇啦！」凌御生一臉無奈，用手背打落鍾家豪嘅小腹上，口快快咁講道：「只係一齊瞓咗晚咋！」
「哦～一齊瞓咗晚呀？」鍾家豪刻意咁喺「一齊瞓」呢三個字上落重音，而且拖慢咗少少嚟講
「我咩都冇做過囉…」凌御生嘅耳仔都開始紅起嚟
「少少歪念都冇？」鍾家豪帶着壞笑，直勾勾地望住凌御生，「一刻都冇諗過要做壞事？」




凌御生記起琴晚佢有一刻衝動，然後直接就將夏巧莘壓咗喺梳化上面，差少少就要理智線斷裂，好彩最後忍咗落嚟
「冇…」凌御生帶着一點遲疑回答道
「哎喲喲～我地嘅御生BB大個仔啦～」鍾家豪一臉安慰咁講，凌御生無奈咁移開視線
「我咩都冇對佢做過囉！」凌御生托住額，有少許無言
「都係錫下攬下啫～」鍾家豪搶答般幫凌御生講埋後面，然後一臉好奇咁望住凌御生，「你地錫過幾多次？」
「邊個會數住呀？」凌御生皺起眉頭，一臉疑惑咁望住鍾家豪
「哦～」鍾家毫露出一個意味深長嘅笑容，「睇嚟錫過好多次喎～」
「煩呀你！」凌御生灘低喺梳化上，「幾點夾Band呀？」
「陣間5點，去番之前去開嘅Band房。」鍾家豪耷低頭睇手機
「夏巧莘琴晚同我講，佢中意我。」凌御生嘅表情突然沉咗落嚟




「咁唔係開心事咩？你都中意佢㗎唔係咩？」鍾家豪望住凌御生彷彿有心事般嘅表情
「嗯…今日起身嗰陣佢話記得琴晚我話中意佢，但係我同佢講話係佢聽錯，我冇咁講。」凌御生一臉難受，始終「拒絕」咗自己中意嘅人，仲要講咗一個大話
「佢會明白嘅～」鍾家豪拍一拍凌御生嘅背脊，「不如咁啦，夾Band你揀首情歌，咁咪可以順便話佢知你嘅心意囉！」
「都好喎。」凌御生一下子坐起身，「唱咩好呢…」
「唱《哪裡只得我共你》囉～」鍾家豪提議道，「又或者…呃…呃…未諗到…」
「唉…真為好煩呢…中意但又唔可以一齊…」凌御生低頭望住手機，苦笑道，「如果我屋企嘅背景正常啲咪好…」
「唔係㗎，你只要克服到你嘅心理陰影就得啦。」鍾家豪鼓勵凌御生，「我諗你媽媽會係最想你克服到呢個關口嘅人。」
凌御生整個人向後靠，靠喺梳化嘅椅背上，微微低頭，若有所思

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link