[愛情走糖故]兩個人心底中不為人知嘅秘密,成為兩個人間嘅牽引: 34.四手聯彈

凌御生行出睡房，行到門前開門比佢
「嚟到都唔㩒鐘要我開門比你…」凌御生望住夏巧莘
夏巧莘跟住凌御生入屋，將波鞋除咗落嚟放喺一邊
「我老豆唔喺屋企。」凌御生見到夏巧莘左顧右盼咁
「嗯…」夏巧莘微微點頭，凌御生行咗入房
夏巧莘輕輕將門推開咗一條縫，探頭入去望
房入面好涼，冷氣嘅扇葉上下動着，夏巧莘從門縫間攝咗入去，然後輕輕閂上門
「我地今日先見完咋喎，咁快就掛住我啦？」凌御生開玩笑道，然後拎起放喺床上嘅結他
「冇掛住你囉…」夏巧莘無奈咁搖搖頭，「你識彈結他？」
「嗯哼，如果唔係做咩買個結他番嚟？」凌御生坐喺書枱前，拎好結他，「坐啦。」




夏巧莘行到床邊坐低，凌御生開始彈起結他，自彈自唱起嚟
「再～見～共你本來就分得那樣遠～或是你太好，因此我更怕～相戀會殺掉最後的…那點…」
凌御生嘅歌聲傳入夏巧莘嘅耳朵中，夏巧莘驚訝咁張大口
「再～見…噗…」凌御生正想唱第二段嘅時候，望到夏巧莘一臉錯愕忍唔住笑咗出嚟，「做咩咁嘅表情呀？」
「比想象中好聽好多！」夏巧莘用手掩住口，完全冇辦法想象平日好似小渾渾，帶住磁性聲線嘅佢，唱歌會咁好聽，「估唔到呢～」
「平時冇唱歌啫～」凌御生揚起嘴角笑道
「咁我宜家咪好Lucky？」夏巧莘甜甜地笑起嚟
「係㗎～」凌御生點點頭，「你識唔識樂器嗰啲？」
「識彈琴囉，之後冇啦。」夏巧莘回答道
「我屋企有鋼琴，彈嚟聽下～」凌御生放低結他企起身，行到床邊拉起夏巧莘，「行啦！」




凌御生拉住夏巧莘行出客廳，夏巧莘冇反抗，只係由得佢拉住自己，一啲都唔介意同佢有身體接觸
「自彈自唱！得唔得，冇譜嘅話。」凌御生行到鋼琴前，夏巧莘坐低，然後打開鋼琴嘅蓋面
「梗係得啦～」夏巧莘自豪咁笑道，「想聽咩歌？」
「你中意唱咩歌就咩歌啦～」凌御生企喺鋼琴旁邊
「咁呀…」夏巧莘諗咗一陣，嘴角微微上揚，手指放到鋼琴鍵上，「期望飛上恬靜月球遙望每家的窗，誰伴心愛露臺玫塊香…」
手一動就彈起前奏，唱起Gin Lee嘅《月球下的人》
幽幽琴聲，加上夏巧莘本來甜美嘅聲線，唱出咗同Gin Lee唔同感覺嘅《月球下的人》
凌御生一臉津津有味咁企喺旁邊欣賞呢個獨家演出
散着嘅長髮喺博頭滑落，但完全唔阻礙夏巧莘彈琴，陶醉嘅樣子幫佢嘅魅力又再加幾分
「任記憶也隨日出依稀～沒法子、帶走都思念你…」




樂曲完結，夏巧莘雙手嘅動作變得好輕，慢慢咁停落嚟，彷彿跟住呢首歌，紓發最後嘅情感一樣…
「你鋼琴有冇考級？」凌御生好奇咁問道，「彈琴咁叻應該都有考啦～」
「有考，考到七級就冇考落去啦…」夏巧莘微微一笑
凌御生坐到夏巧莘隔離，手放到琴鍵上
「我都考到七級。」凌御生講完，就彈起陳奕迅嘅《月球上的人》
但彈出嚟嘅卻係低音版，夏巧莘聽到之後忍唔住同佢一齊彈
兩個人一齊坐喺鋼琴前，從後面望落去，成個場景同畫面變得好唯美
彈出嚟嘅每個音節都係完美，兩個人彷彿有着高度默契一樣，先可以奏出如此配合嘅樂曲
凌御生同夏巧莘兩人都察覺到同對方原來咁有默契，但係兩人都冇講出口，只係喺心中偷偷一笑
直至呢着歌完結嘅時候，兩人停落嚟，然後不約而同咁望向對方
諗下當你企喺佢地嘅背後望住呢一切嘅發生，成個畫面會有幾唯美？
「睇唔出你識結他又識彈琴。」夏巧莘甜甜咁笑起嚟
「同本來嘅形象唔夾，所以你先會覺得驚訝啫～」凌御生耷低頭微微一笑，夏巧莘呢個講法，係佢意料之內嘅事
「冇估到你會識，同你本身個形象差好遠。」夏巧莘笑一笑
眼前呢個男仔，人前人後原來真係兩個人嚟，睇嚟仲有好多自己估唔到嘅嘢會出現




凌御生呢啲不為人知嘅「秘密」引起咗夏巧莘想了解佢更多嘅心

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link