[愛情走糖故]兩個人心底中不為人知嘅秘密,成為兩個人間嘅牽引: 31.擔心

「啱啱你地發生咩事呀？」夏巧莘一臉擔心咁問，但眼見鍾家豪冇出聲，頓時就再講道，「對唔住，我唔應該多事…」
「係劉子勤挑釁阿生在先。」鍾家豪聽到夏巧莘咁講之後就開口道，「佢問阿生點樣溝到你，然後問…講咗啲過份嘅說話，阿生就出手打佢。」
夏巧莘若有所思咁微微耷低頭，然後又抬起頭一臉疑惑咁望住鍾家豪
鍾家豪眼見夏巧莘好似想再追問落去，深一深呼吸
「佢問阿生係咪同你上過床，所以換到男朋友嘅位…」鍾家豪一臉嚴肅
夏巧莘冇出聲，原來凌御生係因為自己所以先出手打人…
「你拎枝水上去比佢啦…」鍾家豪行番落去，行到夏巧莘面前，將其中一枝水遞咗比夏巧莘
夏巧莘接過枝水，然後細聲咁柔聲道：「多謝…」
「你要多謝嘅話，應該同阿生講。」鍾家豪微微一笑，然後就喺夏巧莘旁邊行過咗，走向課室嘅方向
夏巧莘拎住枝水，邁步踏上梯級，向天台走去




凌御生一個人坐喺天台，等緊鍾家豪買枝水番嚟比佢，忽然聽到天台門發出「咔嚓」一聲
「你買枝水都買咁耐㗎，溝女呀？」凌御生冇擰轉面望過去，所以唔知上到嚟天台嘅人根本就唔係鍾家豪，而係夏巧莘
夏巧莘冇出聲，手拎住枝水一步一步走向凌御生，行到去佢坐嘅長櫈隔離，望到喺凌御生臉上打架嘅痕跡
「做咩唔出聲呀？」凌御生問道，然後睜開眼，見到夏巧莘企喺度，「係你嘅？我仲以為係鍾家豪。」
「鍾家豪番咗課室，佢叫我拎比你。」夏巧莘將枝水遞比凌御生
「唔該～」凌御生接過枝水，即刻就擰開樽蓋飲兩啖，「口渴死了。」
「比我睇下…」夏巧莘捉住凌御生嘅臉頰，轉向自己，「瘀晒啦…嘴角都紅咗滲血啦…」
「冇事呀～好小事咋嘛～」凌御生見到夏巧莘一臉心疼嘅樣子，伸手摸摸佢頭
「嘴角仲滲緊血出嚟啦！」夏巧莘一隻手放喺凌御生下巴，等凌御生冇得郁嚟郁去，另一隻手就伸入裙袋拎紙巾
凌御生望住夏巧莘，偷偷揚起嘴角輕輕一笑，見住呢個女仔一臉擔心，心中不禁有啲開心




「唔好郁…」夏巧莘將紙巾㩒落凌御生嘅嘴角，「痛唔痛呀？」
「小小…」凌御生望住眼前呢個認真嘅女仔
「把口生喺人地度…你理得佢講咩啫…」夏巧莘露出咗唔開心嘅表情，偷偷扁嘴，「下次唔好打架啦…」
「係佢挑釁我在先。」凌御生一臉理所當然咁講，「而且係佢亂講嘢我先打佢。」
夏巧莘喺心中不禁暗暗歡喜，然後喺凌御生嘅臉頰上落下一個吻
「我咩都知道，鍾家豪講咗比我知。」夏巧莘嘅嘴角微微揚起，「下次唔好再出手啦…」
「佢真係多口…」凌御生細聲抱怨
「下次唔好理劉子勤就啱啦～」夏巧莘微笑道，「佢把口不嬲都衰。」
「嗯…忍到佢嘅話。」凌御生撇開臉，望番住前面
「你係因為我…先出手打佢？」夏巧莘問道，其實都有啲私心同好奇，到底自己係咪佢出手嘅原因




「係掛…」凌御生嘅回答模棱兩可，佢咁答因為佢自己都唔知點解會出咗手，夏巧莘聽唔到佢嘅答案反而有啲失望
凌御生似乎都留意到夏巧莘嘅失望，笑了笑
「對你嚟講個答案重要？你在意個答案？」凌御生問道，「在意我係咪因為你而出手？」
「唔係呀～問下啫～」夏巧莘假裝不在意咁露出笑容
「你當係啦，就當我係因為你而出手打佢。」凌御生比個答案夏巧莘同時比個答案自己
「你自己講㗎咋～我冇逼你㗎～」夏巧莘滿足咁露出甜甜嘅笑容
「嗯…」凌御生點頭，自己都有啲愕然，自己竟然唔捨得望到呢個女仔失望心疼嘅樣子
或者呢個女仔，會成為佢唯一嘅弱點…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link