[愛情走糖故]兩個人心底中不為人知嘅秘密,成為兩個人間嘅牽引: 30.挑釁

星期一大家照舊番學，喺小息嘅時候，凌御生正準備同鍾家豪一齊去買嘢食
豈料一踏出課室就有人挑釁凌御生
「呢個咪凌御生？」一個男仔一臉囂張咁走向凌御生，「最近好勁咁喎，校花都比你溝到～」
凌御生朝聲音方向望過去，係喺呢一級入面出名串嘴嘅男仔，劉子勤
呢個人最中意周圍挑起火頭，平時喺學校周圍得罪人，今次就挑釁凌御生
「關你咩事呀？」鍾家豪眯起眼
「有女有跟班，你最勁啦～」劉子勤輕佻咁講道
「你突然發咩神經？一番嚟就亂講嘢。」凌御生一臉唔耐煩
「你到底係點樣溝到校花，憑你咁你質素。」劉子勤笑住咁問
「關你事？」凌御生挑挑眉




「關佢事～佢之前都溝過校花，不過食咗檸檬。」鍾家豪諷笑道
「唔緊要啦～過咗去嘅事嚟。」劉子勤聳聳肩，突然靈機一動，「我知啦～」
劉子勤扮型咁插住褲袋行到凌御生面前，細細聲咁講道：「你「品嚐」過校花，所以咁樣嚟交換男朋友個位番嚟？」
鍾家豪聽到之後即刻就瞪大眼，凌御生諗都冇諗就揮拳打劉子勤，劉子勤比凌御生一拳擊中臉，後退咗兩步
「咁大反應呀～」劉子勤笑咗笑，「你打我，我還番比你！」
劉子勤講完就即刻出拳，打中咗凌御生隻眼旁邊嘅位置
鍾家豪見到凌御生比劉子勤打中，即刻就幫兄弟出頭，形成二對一嘅狀況
凌御生一腳踢落劉子勤腹部，劉子勤用力揮拳，打中凌御生嘅嘴角，凌御生嘅嘴角隨即滲出鮮血
劉子勤用手肘撞向鍾家豪，擊中鍾家豪小腹
三個人喺走廊打架，引嚟四周嘅同學都企喺旁邊，或者從課室中探頭出嚟圍觀




過咗一陣之後，訓導主任上到嚟，即刻就喝停咗三人
「喂！你地三個做咩呀！停手！」訓導主任吆喝道
三個人已經遍體鱗傷，臉上面都有明顯嘅瘀傷
「跟我去教員室！」訓導主任指住佢地三人
三個跟喺訓導主任身後，從後梯上去教員室
碰巧夏巧莘從上面落嚟，同三人迎面碰面，凌御生同夏巧莘瞬間就對上視線，但好快就移開咗視線，跟住主任繼續行上去
主任坐喺位，三人企喺度仍然一臉不爽
「你地三個想點呀？」主任皺起眉頭，「打架，一人一個缺點！唔洗解釋。宜家去自習室寫悔過書！寫完交咗先好番課室！」
三個人冇出聲，一人拎咗張紙同筆就去自習室寫悔過書
寫完之後，凌御生同鍾家豪一齊去交悔過書




「嗯，你兩個番課室啦。」主任點一點頭，「凌御生，你最近嘅情況已經好咗，點解突然又犯事？」
「主任我冇嘢要講。」凌御生答咗一句，然後就同鍾家豪一齊轉身離開教員室
兩個人離開咗教員室之後並冇番課室，反而上咗天台，照舊坐番喺左邊嘅長櫈上
「我真係估唔到你會出手。」鍾家豪嘅腦海中，仍然對於凌御生出手嘅一刻感到愕然
「Sorry，連累你都比人記咗個缺點，仲比佢話你係我跟班…」凌御生嘅雙手放鬆放喺雙腿之間，微微耷低頭
「一世人兩兄弟，講咩對唔住呀～」鍾定豪一臉不在意咁笑道，「佢真係好黑人憎，但我真係冇諗到你會出手打佢。」
「佢講嘢過份，我先打佢。」凌御生笑一笑
「最好係真係因為呢個原因啦～」鍾家豪笑言，然後望一望手錶，「我落去買枝水，買埋比你？」
「嗯…」凌御生點點頭，然後合埋眼
點解自己會咁衝動揮拳？聽到劉子勤講啲咁嘅嘢嘅時候，真係忍唔住就出手打佢…
鍾家豪落到小食部，喺飲品機入咗硬幣，然後㩒咗兩枝水
佢拎住兩枝凍水打算行番上天台，行到上去3樓嘅時候見到夏巧莘，夏巧莘望住鍾家豪，一副欲言又止嘅表情
鍾家豪微微揚起嘴角，然後再踏上梯級
「鍾家豪！」夏巧莘嗌住咗佢，鍾家豪回頭望向夏巧莘，「啱啱你地三個…凌御生佢…」
「你想知道啲咩呀？」鍾家豪問道





IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link