[愛情走糖故]兩個人心底中不為人知嘅秘密,成為兩個人間嘅牽引: 09.冤家路窄

凌御生托住下巴，仍然冇出聲，咩都冇講
「哦！我知啦！」鍾家豪見凌御生冇出聲，靈機一動，突然大聲講道，「你同校花拍拖！」
鍾家豪唔講都冇事，一講就吸引咗班上所有同學嘅目光
所有人都望向佢凌御生，凌御生一臉無奈，都唔知道要答佢咩好
課室中突然變得鴉雀無聲，只有天花板上嘅吊扇轉動所發出嘅聲音
所有人嘅目光凝聚喺凌御生身上，所有人都好似期待緊凌御生講個答案比佢地聽一樣
「你估下…」凌御生托住下巴，露出一個意味深長嘅微笑，回答咗三個字
佢咁樣一答，所有人瞬間就哄動起嚟
「真、真係㗎？」鍾家豪企咗起身，然後一臉愕然咁望住凌御生，「我隨便講下㗎咋喎…！」
「我冇答你啲咩呀～叫你估下咋嘛～」凌御生坐好起嚟，下巴有個紅印


「好，上堂啦！」Mr Yau行入課室
鍾家豪用一臉覺得難以置信再加上愕然嘅表情但喺度同凌御生對望
「真係㗎？」鍾家豪細聲再問道
「你估下～」凌御生揚起嘴角，抬頭望住鍾家豪
「真係拍拖呀？」鍾家豪已經係第三次一臉難以置信咁問
「都話你估下囉！」凌御生成個人斜晒咁坐，雙手插喺褲袋，一臉無奈
「鍾家豪，你仲企喺度做咩呀？」Mr Yau企喺電腦枱前面，望住企喺度嘅鍾家豪，「出嚟幫我派嘢。」
鍾家豪由離開個位直到佢行到出去，一直回頭望住凌御生，仍然覺得難以置信，但事實上凌御生冇承認亦冇否認任何嘢
「真係㗎？」鍾家豪拎住疊工作紙，然後喺出面一邊派一邊用口型問
凌御生聳聳肩，然後就耷低頭望住放喺櫃檯嘅手機


…
到咗Lunchtime，凌御生同鍾家豪兩個人上咗天台，坐喺今朝早坐咗左邊長櫈
鍾家豪一邊將飯夾入口，一邊直勾勾咁望住凌御生
「你望住我做咩啫？」凌御生輕皺起眉頭
「一世人，兩兄弟，拍拖都唔同我講！」鍾家豪極不爽咁望住凌御生，「我唔開心呀！宜家有女得啦！唔洗要兄弟啦！」
「我好似咩都冇講過…冇話過同佢係拍緊拖喎…」凌御生無奈耷低頭食飯
「你都冇話唔係同佢拍拖喎！」鍾家豪嘅表情極似呷醋咁，然後嘆氣道，「有嘢唔同我講啦宜家…唉…」
「我同佢真係冇嘢咁點同你講呢？」凌御生抬頭望佢
天台嘅門「咔嚓」一聲咁開咗，然後一股寒氣直逼凌御生
凌御生回頭望過去，見到夏學謙自己一個人企喺天台門前盯住佢


「冤家路窄。」夏學謙冷冷吐出四個字，鍾家豪一頭霧水咁望住夏學謙
「你兩個幾時結怨㗎？」鍾家豪細聲問凌御生
「佢單方面討厭我咋…」凌御生講道
「你離佢遠啲，我咪唔討厭你囉。」夏學謙坐喺中間嘅長櫈上，望住前方但完全無表情，冷冷咁講
「你係唔信我嘅，番去問夏巧莘囉。」凌御生講道
坐喺中間嘅鍾家豪一頭霧水，完全唔知發生緊咩事
夏學謙冇出聲，諗起嗰晚問起夏巧莘嘅時候，夏巧莘嘅回答，係輕輕咁「嗯」咗一聲
但夏學謙完全唔肯相信呢個係事實，因為夏巧莘平日唔會同凌御生接觸到
而且全校都知凌御生係咩人，犯事記錄多到一個點，佢敢認第二都冇人敢認第一，品學兼優嘅夏巧莘更加唔會同佢有任何接觸
所以夏學謙認為一定係凌御生嘅錯，係佢抽水在先
「做咩唔出聲呀？」凌御生開始反擊過去，望到夏學謙一聲不響，微微揚起嘴角，就好似知道咗啲咩一樣，「定係夏巧莘嘅答案你唔肯信係事實咋？」
「做咗啲咩你地…」鍾家豪細聲問道
「冇做啲咩。」凌御生搖頭
夏學謙一直都冇出聲
天台嘅門再次「咔嚓」一聲推開咗


夏學謙同凌御生同時望過去，夏學謙即刻跑咗過去
「我地去第二度食。」夏學謙對擰住飯盒嘅夏巧莘講
「做咩要去第二度食？」夏巧莘不解咁問，眼尾瞄到凌御生同另一個男仔都喺度，夏巧莘躲開夏學謙，然後行向凌御生，「你都喺度嘅？」
「同佢上嚟食飯。」凌御生抬一抬下巴，示意同鍾家豪一齊
「嗨～」鍾家豪回頭望向夏巧莘，然後揮一揮手
「嗨～」夏巧莘微微笑道回應
夏學謙行到去夏巧莘身旁，板起了臉

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link