[愛情走糖故]兩個人心底中不為人知嘅秘密,成為兩個人間嘅牽引: 08.就是看你不順眼

「你唔好用個咁嘅眼神望住我…」凌御生望到夏巧莘一副同情嘅表情，「我唔可憐。」
凌御生從褲袋中拎咗部手機出嚟，望一望時間
夏巧莘嘅頭向住正前方，下巴微微抬高，合起咗雙眼閉目養神，稍作休息
凌御生嘅視線從手機螢幕上移至夏巧莘嘅側臉，肌膚白裏透紅，就算係側臉都無法掩蓋住佢嘅氣質
夏巧莘將心中放空，令心境靜如止水，好好平靜落嚟好讓自己個腦袋同心都休息一下
凌御生偷偷開咗手機中嘅相機功能，偷偷拍下夏巧莘，將呢一刻嘅佢定格喺手機入面
「差唔多完啦小息，要番落去啦～」夏巧莘睜開眼嘅同時，凌御生剛好將手機收到褲袋中，夏巧莘望向凌御生，「你番唔番落去上堂呀？」
「哦，番呀～」凌御生企起身，順手拎起書包，孭起一邊
兩個人離開天台，然後沿住樓梯行番落去3樓
「你小息之後係咩堂？」夏巧莘好奇咁問


「呃…LS孖堂。」凌御生搖搖頭，又笑一笑
「世上竟然有你唔走嘅堂，你中意上LS堂？」夏巧莘攬住疊簿，企喺扶手邊小心翼翼咁落樓梯
「okay啦，冇話特別中意。」凌御生行落兩級，然後背坐樓梯嘅欄杆，雙手捉緊欄杆，然後向後一跳坐到欄杆上，一下子瀡咗落去6樓同5樓嘅交匯平台處
夏巧莘比凌御生嘅舉行嚇咗一嚇，即刻急步行落去
「比你嚇死啦！」夏巧莘一隻手放喺心口前
「咁都嚇到你呀？」凌御生笑道
「都費是睬你呀！」夏巧莘無奈咁講，然後急步行落樓梯，「就嚟夠鐘啦！我番去先啦！」
凌御生望住夏巧莘跑落樓梯嘅背影微微揚起嘴角
豈料呢一幕，剛好比啱啱搵完老師，正打算落番4樓嘅夏學謙見到
「凌御生你又纏住我家姐，你想點呀？」夏學謙將矛頭直指凌御生


「吓？學校好大咩宜家？要撞到有幾難？」凌御生心中認為同夏學謙係兩個世界嘅人嚟，點解可以咩都冇睇到就先入為主話係自己纏住佢家姐
不過其實，凌御生早就習慣咗其他人先入為主，因為自己係壞學生，大家對自己有偏見並唔出奇
「唔通佢會特登去搵你呀？」夏學謙挑起眉
「你中意點諗咪點諗囉～」早就習慣咗大家都係先入為主嘅凌御生毫不在意咁聳聳肩，然後無視夏學謙就行落樓梯
夏學謙對於凌御生完全放心唔落，總覺得佢對夏巧莘不利，最怕自己一唔為意，凌御生又去纏住夏巧莘
凌御生落到3樓，經過夏巧莘嘅課室
凌御生望入課室中，見到坐喺課室最後一行，靠住窗邊嘅夏巧莘托住頭，正低頭寫緊嘢
「果然係好學校，優等生就係唔一樣…」凌御生心諗
喺大家眼中嘅好學生，喺夜晚就會搖身一變，變成陪酒小姐，而第一個知道呢個秘密嘅人，竟然會係凌御生
兩個人之間「各取所需」嘅交易，拉近咗兩個人嘅關係


凌御生經過咗夏巧莘嘅課室，夏巧莘就抬頭望向走廊，然後又耷低頭繼續寫筆記
「捨得番嚟啦咩？」一個男仔見到凌御生推開課室門着時候，就已經行出去迎接佢嘅好兄弟
「頭兩堂英文呀，我梗係走咗佢啦！」凌御生行向自己個位
「叮…噹…叮…噹～叮…噹…叮…噹～」
小息完結鐘聲響起，凌御生啱啱好坐低喺位，書包掛咗喺木枱隔離嘅勾上
教英文嘅Mr Yau一向都唔會準時上堂，一定會遲上嚟上堂
「噓！」啱啱嗰個男仔對住凌御生噓咗一聲，其實佢就坐喺凌御生隔離
「噓乜鬼？佢又未到。」凌御生望向佢
「我想問你呢，你幾時同校花咁熟㗎？」佢一臉好奇，期待住凌御生嘅答覆
「鍾家豪，你幾時變得咁八卦㗎吓？」凌御生用手一下就拍落佢個頭度
「唔係我八卦呀，係大家都好奇！」鍾家豪用手㩒住個頭
凌御生見到佢個好奇樣就唔太想講，於是靜咗落嚟撇開臉
「喂！係咪好兄弟先！」鍾家豪伸手打落凌御生嘅手臂上

IG Link: https://www.instagram.com/nd_cotttoncandy/?hl=zh-tw


回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link