【港產片系列】獵殺影評人: 第八回

Suki洗完噪出來，換上新買的小背心和運動短褲當睡衣穿著。

本來看到Suki白滑的手臂和美腿，毛里平應該會感到高興，可是這刻完全提不起勁欣賞。

看到毛失魂落魄的様子，Suki關心地問：「做咩事呀？面青青咁嘅？」

毛把剛才電視新聞內容說給她知，並說出自己的推論。

Suki：「唔係呀？咁啱啫，老總又點會做埋啲咁嘅事呀？平時佢對我哋啲員工好好㗎！」





毛：「你話啦！呢個世界邊有咁啱呀？」

Suki：「不如我打電話俾老總問下先。」

說罷Suki立即撥電話。

『您所打電話暫時未能接通……』

一連試了幾次都是未能接通，Suki放棄了。





Suki：「唔知點解打唔通，老總從來唔會熄電話㗎。」

毛：「咁即係關佢事啦！我都覺得奇怪啦，專登叫我唔好同妳喺埋一齊，就係諗住出賣我！仲好可能係用我條命嚟換妳嘅安全，唔……越諗越似嘞。」

Suki：「做戲咩？老總都唔係咁嘅人，我總係覺得唔關佢事，佢都話咗會同鐡漢傾掂單嘢，又點會出賣我哋呢？」

毛沒有心情爭抝，坐在自己的床上沈默起來。

Suki也坐到他的床上，依偎在毛胸膛上，並安慰道：「唔好自己嚇自己，陣間我會再打俾老總問清楚。」





「唉，我成世人都係咁黑仔㗎！」毛感懷身世起來：「一畢業，就入咗電視台做PA助理編導，點知編同導都無得學，淨係負責叫藝員起身、Book車、Book景，同埋俾導演、監製屌，一個禮拜返足七日，日日返十幾廿個鐘，人工仲只係得六千蚊唔夠，一毫子都攞唔到返屋企。」

Suki也想知毛的往事，所以沒有答話靜心聆聽。

「如是者做咗幾年，公司淨係升啲皇親國戚同擦鞋仔，我就做極都咁霉。好彩我都識到啲朋友，介紹我去電影公司學做編劇，嗰時係跟肥精嘅，因為佢嘅電影部部都收得，對下面班手足又大方，所以人工比電視台好好多，最後更成為正式編劇，出咗一丶二稿劇本就俾肥精執，雖然出街時未必會落我個名，但一個劇本可以賣到幾萬蚊，兼且嗰時電影市道好，可以話係長做長有。」

毛頓了頓再道：「好景不常，踏入二千年，電影市道越嚟越差，我呢啲唔出名嘅編劇開始無乜嘢做，捱咗一陣，發現唔係辦法，就走去兼職揸的士，間中幫啲導演度下橋，賺下車馬費咁。後來大陸通過CEPA，港產片可以合拍片形式喺大陸上映，一時間香港電影人又開始活躍起嚟，一啲轉咗行嘅行家，都返番去電影圈，我亦因為咁再做返編劇，仲喺呢個時候識咗前度女友，佢係一個新入行嘅編劇。」

毛環抱著Suki手臂「我跟返肥精，人工比以前更好。不過因為大陸審批問題，一個劇本通常要改完再改先至可以通過。雖然係咁，但我都好開心，可以做返電影呢行，又可以識到志同道合嘅女朋友。但係有一次，我諗住早啲返公司做嘢，一入到去就見到女友喺肥精房出嚟，起初都唔為意，但後來見佢表情尶尶尬尬，又有啲衣衫不整，我就知道發生咗乜嘢事，所以我哋分咗手，我亦都無再幫肥精打工……」

Suki完全可以感受到毛里平當時的痛苦。

「跟住我就幫唔同編劇度下橋、做下資料搜集，都叫做搵到兩餐嘅……不過我學咗肥精嗰套，成日俾啲導演Ban我橋，話我啲嘢老土。但係最近肥精套賭片，咪用返廿年前啲橋之嘛，一様喺中港大收特收。之後我就去咗你哋間報館寫影評，收入開始穩定，點知……點知又發生單咁嘅事……」

說到後來，毛的語調開始嗚咽，眼角亦流下一滴淚水。





Suki見狀，翻過身來，把自己的嘴唇印在毛的唇上，毛立即有所回應，雙手更放肆在她身上搜索，正當想脫下她上衣時……

「咪住先啦，你去沖個涼先好唔好？」

哪個男人會說不好？

毛起身下床，就在此時，房間的電話響起。

二人都被突如其來的響聲嚇了一跳。

Suki拿起電話：「喂。」

電話那頭：「小姐我哋係Front Desk打嚟，呢度有位先生，佢話係妳嘅總編輯，想要妳房間號碼，唔知方唔方便呢？」





！！！