【港產片系列】獵殺影評人: 第六回

Suki撥電話給她的總編輯。

Suki：「喂，老總！有啲麻煩事想問下你點算好？」

於是Suki便一五一十，由毛里平在家樓下被追，直至她打傷星火後逃去都說清楚。

總編輯：「咁大鑊？」

Suki：「如果唔係咁大鑊都唔駛向你求救啦，我哋真係唔知點算好？」





總編輯：「嗱，妳唔駛驚，我一定幫妳拆掂佢，妳係我最得力嘅下屬，我唔會俾妳有任何損傷。」

Suki：「多謝妳呀，老總，但係而家有乜辦法呀？」

總編輯：「咁啦！妳先請幾日假，身痕都唔好交稿住，我親自搵鐵漢交涉，應該搞得掂嘅。」

Suki：「搞得掂？點樣搞得掂呀？佢好似四圍發散人搵身痕咁，頭先差啲就俾佢哋捉走呀！」

總編輯：「鎮定啲！我最多用一年唔搵狗仔隊跟佢做條件，再唔得就加埋一年唔報導佢負面新聞，佢應該肯嘅。」





Suki：「但係未傾掂數之前，我哋都仲係有危險喎。」

總編輯：「咁啦，妳今晚上嚟我度瞓，我貼身保護妳，直到成單嘢搞掂為止。」

Suki：「吓？咁唔方便嘅，阻住你同你老婆，唔係幾好意思。」

總編輯：「唔駛擔心喎，我老婆同班friend返咗大陸玩幾日，得我哋兩個咋。」

Suki：「兩個？咁身痕呢？」





總編輯：「叫佢自己諗辦法啦，我老婆好怕第二個男人陣味㗎，俾佢返嚟聞到我死梗㗎，所以真係唔俾得身痕佢上嚟㗎。」

Suki：「咁我都唔上嚟啦，我諗都係過澳門避幾日算啦。」

總編輯：「澳門？都好嘅，到步後打電話俾我。仲有，千祈唔好同身痕住埋同一間酒店，一定要分開住！」

Suki：「點解呀？」

總編輯：「啊……咁…咁係因為就算是但一個比鐡漢刮到，都唔駛一鑊熟吖嘛。」

掛了線後，Suki覆述了總編輯的說話。

聽到可和Suki一起過澳門，毛里平開心得完全忘了自身的危險。

毛：「Suki呀，咁我哋係咪分開住兩間酒店呀？」





Suki：「梗係唔係啦！兩個人住埋一齊，點都叫做有個照應吖嘛。」

「Yes！」毛沒有說出口，只在心裡大叫。

兩人在尖沙咀中港碼頭上船，Suki坐窗邊位，毛里平坐路口位。

上了船後，Suki好像放鬆不少，主動找話題和毛里平說話。

Suki：「點解你四十歲人都未結婚嘅？」

毛：「你點知我四十歲㗎？」

Suki：「哈！我點會唔知啊？你嚟我哋份報紙寫影評，係我同你登記㗎！唔止年齡，地址同銀行戶口號碼，我都一清二楚。」





毛：「嘩，仲有無私隱㗎？」

Suki：「無㗎！」

兩人相視大笑。

笑過後，Suki繼續話題：「其實你一啲都唔似四十歲，又無皺紋、又無中年發福，頭髮仲好濃密，係著衫老土啲啫。」

毛：「妳咁讚我，我會誤會妳鍾意我㗎。」

Suki不回她的話，引開話題：「你有無女朋友㗎？」

毛：「無㗎，自從五年前同前度分咗手之後，一直都無女朋友。」

Suki：「五年？咁你點解決男人嘅需要？」





毛：「乜妳咁咸濕㗎？問埋呢啲嘢嘅？」

Suki雙頰一紅：「人哋好奇之嘛？」

「我會打……波、游水發洩精力。」毛在Suki面前不好意思說出真相。

Suki：「我以為個個男仔都好似《那些年》套戲咁成日打手槍。」

毛：「第二個或者係，但係我覺得性唔係發洩，而係兩個人相愛後自自然然發生嘅事。我又唔會上咸網同睇四仔搞到自己衝動，生活作息定時，亦有足夠嘅運動，加上無邪念，所以乜嘢手槍、飛機都唔駛打。」

坐在毛前方的中年男乘客，轉過身來以極之鄙視的眼光看了他一眼，然後轉回身説了一句：「鳩噏！」

毛沒有理會，向Suki問道：「咁妳呢？妳又有無男朋友呀？」





Suki：「我無呀，之前嗰個三年前分咗手啦！我哋喺大學識嘅，不過出嚟做嘢之後，我做記者佢返朝九晩五，見面時間少，佢又成日埋怨我唔陪佢，咁咪分咗手囉。」

毛：「三年呀？咁妳點解決女人嘅需要呀？」

Suki聽後滿面通紅，一面以手掌拍打毛里平的手臂一面道：「好衰㗎！人哋女仔都無咁嘅需要嘅！」

他看準來勢捉著她的手掌，以左手緊緊握著她的右手，她也沒有再動手，只低下頭來任由他握著她的手，他也不說話，握著她的手調整至舒適角度，她亦默默把頭靠在他肩膀，二人就這樣靜靜地迎接這第一次的「牽手」。

船繼續向澳門進發，但於毛里平心中，這是開往幸福的航道。