埋舟: 第五日•晚
第五日•晚
大鐘的響聲再次把我吵醒，時間不知不覺已經到了七時，但我仍然感到疲累，就像沒有睡似的，但很快我便知道原因了。
「點解……點解我條褲會洗咗仲晾緊？」此時，我憶起睡夢中曾聽到過水聲和洗擦聲，不禁在心裡想：「睇嚟我真係有夢遊，咁琴晚我喺出面究竟做過啲乜？睇嚟都係同代行者講聲，再部署吓今晚嘅行動。」
我穿上新褲子後，便往教堂走去。坦白說，天還是挺亮的，我尚未有餓意，但為了今晚的調查行動，我還是要吃點東西。
領過飯祈禱過後，我又再次和代行者進房內密談。
「我覺得我真係有夢遊，啱啱我恰咗陣，醒返竟然發現有泥濘嗰條褲已經洗咗仲晾緊，我唔知可以點做。」我驚慌的對代行者說。
他聽後，拍拍我的膊頭，然後說：「都係我唔好，將呢個重擔加係你身上，搞到你有夢遊，不過神洛基會保祐你，接住落嚟嘅嘢交返畀我，你抖吓喇。」
「多謝你嘅好意，不過唔得，我要親手解開呢個謎，呢件事有太多可疑嘅地方，如果查清楚之後，好有可能幫我哋真正戰勝呢隻game。」我婉拒了代行者的好意。
「你發現到啲咩？」代行者好奇的問：「好有可能就係破案關鍵。」
「現階段我都唔係好肯定，但我真係諗唔明點解過咗九點佢哋畀人打沉，但行兇者都無事，唔通呢度真係遊戲大會嘅盲點？」我大惑不解。
「呢個係因為有神洛基嘅庇祐。」代行者說得十分肯定。
「真係因為咁？」我心裡始終對神洛基存疑，但並沒有表現出來，而口裡則說：「神洛基果然神通廣大，無信錯佢。不過代行者，今晚我有個行動，我想親手揭穿Slender Man嘅真面目。」
「你想點做？」代行者問。
「未有諗法，所以先諗住同你傾傾。」我坦白的說。
「Slender Man始終都係傳說，我之前都講過，咁耐我都未見過，只係大家嘅集體幻覺，我勸你都係抖吓好，唔好為呢個傳說花太多心機，唔係你夢遊症加劇仲麻煩。」代行者打算繼續勸退我。
「但我始終唔係太相信會有集體幻覺，畢竟事先唔係好多人認識Slender Man，但大家都見到同一個形像嘅生物，似係真實多過幻覺。」我嘗試說服代行者讓我調查。
「執行者，你有無親眼見過Slender Man係咩樣？」我搖頭，他續說：「咁你點知大家見到嘅Slender Man形像都係一樣？定只係你覺得係一樣？」
我一時之間語窒，無言以對。
代行者得勢不饒人，繼續說：「呢啲都市傳說你聽過就算，根本都無人親眼見過，連我晚晚巡都唔見，佢哋點會見到呢？」
「咁點解你要大家九點之後唔好落樓？」我想起49號跟我說是有Slender Man的緣故，而且這正正是代行者親口對她們說的。
「因為係想保護佢哋，驚有心懷不軌嘅人會乘機殺人。」代行者義正辭嚴的回答我。
「九點都休戰期，仲點會有人殺人？」我反問。
「你永遠唔會知魔鬼係點行動，所有規則都會有漏洞，我哋永遠都防唔到，我唯一做到嘅只有盡力令佢哋避開危險。」代行者正氣十足，我也反駁不了。
人就是一種很奇怪的生物，會服從權威，即使這權威的道理不能完全站穩住腳，但都會偏向信服。代行者的說話的確有可疑的地方，與之前49號跟我說的有些許出入，但他的氣勢和肯定，戰勝了我的疑心，使我信服──不過只限此時此刻。
吃過飯臨離開前，代行者對我說：「執行者，你今晚好好抖吓，唔好再查呢件事喇，交返畀我，唔好再加劇你嘅夢遊症，我聽日會同大家講，表揚你對呢次事件嘅貢獻。」
代行者表面上是關心我的狀況，但說白了是要削我權，不讓我再插手調查事件，不過我都會暗地裡獨自調查事件，畢竟代行者的表現令我生疑，回想一下，他也是獨自一人，無不在場證明，所以他也是嫌疑人之一，而且他會獨自在晚間巡邏，的確可以有足夠時間犯案，但兇手是如何避免九時休戰期期間打沉他人的制裁？
現在時間是八時，距離九時休戰期還有一小時，我在Paradise內踱步，竟不知不覺來到廣場中央的海賊旗。這海賊旗我從未認真觀看過，這次總算有機會。
旗幟隨風飄揚，上面的骷髏骨圖案隨著旗幟變化而有不同形狀，海賊旗代表擁有者的形像及生命，以及對自由的憧憬。如果有海盜看到海賊旗在這遊戲的用途，恐怕會認為是侮辱了海盜的情操，於是去殺了提議的人，再順手把遊戲相關的人員都清算，將我們從遊戲中解放出來。
站在海賊旗沉思一輪後，人有三急，於是往廁所走去，這才發覺了一個有趣的設計，原來只有在廁所內才可以看到外面，在廁所外是完全無法看到廁所內的，這設計除了保障使用者的私隱外，又能夠保持廁所的空氣流通，這設計者一定能夠得到最佳廁所設計獎。
如廁後，我回到房間，喝了一杯水後，不知怎的眼皮又開始沉重，睡意很濃，睡魔來襲得很急，我勉強頂著睡意設下小小的機關，以防又再一次夢遊離開房間，之後便倒頭大睡。
這覺睡得很香，但入睡初期還是有發過夢，夢見Slender Man，他在廁所洗手盤前打沉了Paradise內的所有人，最後打沉我，臨打沉前把臉具脫下，還未看到臉後，我便被打沉了。
接著，我便沉沉的睡著了，沒有再發夢。