埋舟: 第五日•早

第五日•早

「嘭嘭嘭……」猛烈的拍門聲強行將我從夢鄉遣返，我勉強撐著惺忪的睡眼，自然的看一下手錶時間，才記起手錶被代行者收起了。

「11號，你有無事？你喺唔喺度？」拍門的人聲叫喊，聽起來很著急。

「嚟喇嚟喇，你等等我，我笠返件衫先。」我邊走邊穿衣，到門口剛整理好便開門。

「一大朝早做咩事鬼殺咁嘈？」我對拍門的人說，縱使我完全不認識他。





「而家已經九點幾，時間唔早喇，見你仲未出現，代行者怕你都出咗事，所以先叫我嚟揾你，不過你無事就好。」拍門的人解釋。

「都？做咩呀？有人出咗事？」的確他用「都」字令我頓時警剔起來。

「係，有幾個人遇害，畀人打沉咗。」他回答說。

「咩話？係琴晚出去揾物資嗰時出事？但佢哋出得去都已經係休戰期，無理由會出事㗎，唔通……」我推理的結論是主持人WKY修改了遊戲規則，以應對Paradise的情況，但我並無將這結論說出口。

「佢哋係喺Paradise入面畀人打沉嘅，根據口供，應該係琴晚嘅事。」他沉重的說：「你都快啲梳洗完，我哋全Paradise嘅人都喺教堂由代行者帶頭悼念緊佢哋。」





「但係琴晚直到休戰期開始都無聽到有人畀人打沉嘅公告，休戰期之後更加唔會有人咁做，因為等同自殺，會同樣爆炸，咁好有可能係六點一開戰嗰時畀人打沉，但點解咁快斷定到係夜晚出事而唔係朝早出事？」我繼續追問。

「因為我係讀法醫，由屍體僵硬程度我就可以推測到死亡時間大約係琴晚八點到十點。好喇，唔好再講住，快啲梳洗落去喇。」他打斷了我的推理，並推我到浴室梳洗。

我一邊梳洗，一邊想：「琴晚九點休戰期開始，之前都無人出事，但法醫又話係八點到十點期間出事，咁即係九點到十點期間喇，但休戰期開始就要停止攻擊，唔係就等同自殺，究竟有幾大仇口先會不惜犧牲自己都要對方死？定抑或法醫判斷錯咗？畢竟佢只係學生……」

梳洗完後，我和法醫也趕到教堂參加悼念會，而在此時我才發現，被打沉的一共有六人，而他們分別是向我搭訕的51號鬍渣大叔、熱情美麗的美女四人組96號、24號、49號和72號，最後還有與我一起勞動的伐木哥94號，要說這六人的共通點就是曾經和我有過交流，如果查下去，我很大機會會成為疑犯，為安全起見，我要先找出兇手才是上策。

「今日悼念會就到呢度，佢哋六個都會繼續喺神洛基身邊開開心心咁生活，我哋應該替佢哋開心先係。如果大家仲有情緒上嘅問題，可以隨時嚟揾我傾。」代行者說完便命人把他們六人的屍體埋葬，並各自立了墓碑，而其他人也跟去送他們最後一程。





「代行者，我而家可唔可以同你傾傾？」我眼泛淚光的問，當然這是我精湛的演技，而他也不虞有詐，一口答應。

「11號，我諗佢哋都算你喺Paradise嘅第一班朋友，我都好遺憾，我會盡快揾到真兇，等佢哋在天之靈得到安慰。」原來代行者都已經找到他們六個的共通點。

「真係唔該哂你，我真係好震驚，而家都未接受到，點解會係佢哋六個？點解會咁突然？究竟邊個同佢哋有血海深仇，要喺休戰期會無咗條命都要打沉佢哋？我真係諗唔明，代行者，你唔係話呢度係天堂，遠離遊戲，可以自由自在生活，唔駛擔驚受怕咩？」我飾演的是一個面臨崩潰邊緣的人。

「對唔住11號，我承諾過大家我會畀個天堂你哋，等你哋生安安樂樂，但而家咁少嘅事我都做唔到，我真係好無用。」代行者也演技大爆發，眼淚已經奪框而出。

「唔好咁講，你已經做得好好，究竟係邊個、喺邊同幾點發現佢哋嘅屍體？我想知，話哂佢哋係我喺度第一班朋友，我想親自去路祭同查。」我試著問。

「好喇，咁我委派你去查今次件事，11號，我正式委任你為今次事件嘅執行者，所有事直接向我匯報，有同我一樣嘅權力，見你如見我，一陣食飯我會同大家宣布。」出乎我意料，代行者竟然爽快的一口答應，還賦予我如此大權力，看來他並沒有懷疑我。

我根據他給我的資料，去到案發現場──城鎮中心廣場的海賊旗。案發地點並沒有清理，圍繞海賊旗滿地都是血跡和肉塊，範圍很集中，看來六人都在同一地點被打沉，沒有反抗，亦都沒有逃走，都是欣然接受被打沉一樣。

「如果六個人都同時喺海賊旗度，有咩可能會唔反抗等死？如果逐個逐個出嚟，遠遠都見到滿地血跡肉塊，正常人都會嚇親跑走，仲點會喺度等死？到底有咩理由令佢哋乖乖哋唔郁等死呢？個兇手究竟點樣做到？」我看著現場慢慢陷入思考迷宮，完全找不到出路。





「諗唔通，轉換環境，去揾發現屍體嘅人問吓先。」之後我便去了找發現屍體的34號問話。

「你好，我係代行者委派調查今次事年嘅人，我係11號，我有啲關於今朝發現屍體嘅嘢想問你。」我找到了34號來問話，而她也一口答應，於是我便問了她一些關於發現屍體時的細節事項，最後總結出幾點：屍體在大約七時被發現，六具屍體都圍著海賊旗倒下，他們都不是穿著睡衣，他們手中都握著寫了「神洛基的感召」的紙條，而當中最奇怪的是，他們的鞋都左右調轉穿，看似是某種儀式。

得到這些線索之後，我再去他們的住處調查，看看有沒有和這儀式相關的線索，只不過什麼也找不到，沒有什麼特別可疑之處，除了Slender Man的圖畫，這令我憶起49號和我說九點後Paradise會有Slender Man的傳說，難道這次事件是Slender Man做的好事？

時間接近中午，我決定先向代行者匯報現在進度，並詢問他有關儀式的事，以及Slender Man的傳說。