人要惡過車！: 八十三

「快啲起身呀！」

我已經瞓梳化㗎啦，仲要半夜叫醒我，係咪玩嘢呀⋯⋯

「做咩呀～嘩！搞咩！？」一擘大眼就見到Jenny姐坐喺度喊曬咁款。

「細佬⋯⋯細佬佢入咗醫院⋯⋯」

「吓！？」發生咗咩事？





「邊行邊講。」

堯姐一臉嚴肅咁講，所以我都唔敢放慢手腳。

。

「請問可以同我講發生咩事未呢？」

「頭先佢咪無聽你電話嘅，結果醫院打電話嚟話阿Chris撞咗車。」





「吓！入廠咁大獲！？佢依家喺邊間？」

「東區。」

「OK。」

正當我喺前面專心揸車趕路，堯姐坐後安慰一直喊緊嘅Jenny。

「細佬......細佬會唔有咩事咖？我會唔會見唔返佢咖？」
「無事咖，你細佬平時咁黐你，邊會揼低你呢。」堯姐一邊摸住Jenny個頭，一邊攞手巾仔幫佢抹乾啲眼淚。





「係咪真咖......？如果真係有咩事，咁......咁我就陪細佬一齊走！！」

係咪要講到咁嚴重先......平時又唔見你對佢好啲......成日丟低個細佬去玩......

「得啦得啦，你哋兩個邊到都唔洗走，留返喺到！！」

。

泊低架車，我哋即刻衝入去醫院大樓，點之又真係比我哋見到個熟識嘅背影。

「細佬？」Jenny行過去拍一拍佢膊頭。

佢企起身擰過嚟，喺我哋面前嘅係身穿病人服，個頭比紗布包咗幾個圈，右手打住石膏，左手揸住杯咖啡嘅Chris。





「哦？家姐你哋嚟咗呀？」Chris反而比我想像中冷靜。

Jenny仔細打量Chris一返，問咗句

「點......點呀？無咩......大礙呀嘛？」

「欸，好少事啫，個頭聯咗幾針，隻手裂咗少少咁啦，叫未死得住，哈哈~」Chris仲可以笑笑口咁講。

「你呀，唔好成日要你家姐擔心先得咖～」堯姐雖然表露出如釋重負嘅表情，但哩句話個語氣總比我感覺到一點無奈。

「係嘅～哈哈～」

「你知唔知你家姐幾咁不安呀，佢差啲就諗住......」

「喂！！！」





「OK OK，唔講唔講。」