人要惡過車！: 第七十九章

叮～

「去咗邊呀？起身唔見咗你嘅。」

噢，係堯姐Whatsapp我。

「同阿爸Uncle佢哋出咗去。」

「咁下晝有冇嘢做呀？」



「無。」

「咁你一陣間嚟屋企樓下接我啦。」

「Ok。」

一陣間？其實一陣間即係幾時？

「係咪乖女要你返去交人呢？」Uncle又知咩事嘅？



「嗯，哈哈。」

「咁仲唔去？」

「佢話一陣間先。」

「一陣間咪即係解依家囉。」阿爸又加把口。

「Yeah！You get me bro！」



「吓？」

「信我就啱㗎啦。」

「哦。」

就係咁，我又要揸車返去啦。

。

話咁快就返到嚟屋企樓下。

叮～ 咦，邊個Whatsapp我？

「Hi」



「Jenny姐有咩幫到你？」

「你今晚應該去Fiona個Party㗎啦。」

「吓？咩Party？」

「堯堯無同你講咩？」

「無喎。」

「咁佢應該一陣會同你講㗎啦。」

「咁你搵我咩事？」



「叫你醒醒定定啫。」

醒醒定定？做錯嘢唔通會俾人殺？

「吓？」

「你唔係唔知Fiona咩人呀嘛？」

屌，我連Fiona係邊個都唔識呀。

「我鬼識佢咩⋯⋯」

「簡單啲講，收兵唔再講，周圍食仔，專拆散情侶。」

佢收兵食仔咁關我咩事？



「咁點？」

「無嘅，如果你夠膽背住我好姊妹亂嚟嘅，後果自負！」

咁睇小我，我先唔會背叛我嘅堯姐。

「不過我信你唔會好似班傻仔用下面諗嘢，下下都搞咗先算。」

「多謝忠告，你可以放心，我屬於堯姐嘅，永遠都係。」

「妖，又放閃。」

「無其他嘢啦嘛？」



「無啦。」

「咁代我同阿Chris問好啦。」

「好。」

。

過咗無幾耐，堯姐就落到嚟。

「咁快返到嚟嘅？」

「妳叫到我用咩方法都飛過嚟嘅。」

「嘻嘻。」傻女又傻笑。

「點呀，想去邊呀今日？」

「唉，今晚要去Fiona生日Party，依家去買禮物先。」

果然好似Jenny咁講，佢依家先同我講，但聽堯姐語氣好似唔願去咁。

「咁去邊度？」

「唔～？旺中啦。」

旺中，全名係旺角中心，同附近嘅新之城一樣專賣價錢便宜嘅時裝，所以吸引咗不同年齡嘅女士買嘢。

頂，星期六下晝旺角多人到仆街，迫到就嚟呼吸唔到，都唔明啲女人點忍。

其實我都唔知堯姐買咗份咩禮物，總知佢搞掂咗啦。睇嚟買完嘢堯姐佢都無諗住走，行咗去第二間飾物舖。

「B呀，你睇吓。」

唔？戒指？

「好靚呀，不如我哋一人一隻呀～」

雖然戴戒指可能會整花個波棍頭，不過無所謂啦，粒波棍頭可以換，但堯姐淨係得一個。

「嗯，好呀。唔該，我想要哩一對戒指。」

「先生我幫你包起佢。」

「好，唔該你。」

話說我俾錢嗰陣先發覺原來旺中哩度啲嘢又真係幾平，我開始明白啲囡點解咁鍾意嚟。

「不如我幫你戴？」

「嗯。」

話說今次係小弟第一次幫女仔戴戒指，究竟戴邊隻手指呀⋯⋯？唉，戴邊隻應該無所謂㗎嘛？

「喔！嘻嘻～」堯姐好似好驚奇咁，之後又傻笑咗兩聲。

「又做咩傻笑呀？」

「嘻，唔話你知～到我幫你戴啦。」

「哦，嗱～」我伸隻左手出嚟。

「以後要聽曬我話～」

「係嘅。」