人要惡過車！: 第六十章

星期日瞓醒，決定去揸EK遊車河，所以就搭車去阿嫲到攞車。

拎咗車就揸架車上新田公路爆下架車，我想講嘅係B偈聲真係好好聽，間唔中谷下部車係真心正。

去到上水就落返普通路，再上粉錦公路，當我慢慢遊車河嗰陣，聽到後面傳嚟高轉嘅引擎聲，仲要唔止一把聲，應該兩架片緊。

不過既然今日無諗住鬥，就無謂阻人啦，打死火燈扭入巴士站等佢地過咗先。

隨著引擎聲越嚟越近，好快就知嚟緊嘅係咩車。





過咗無幾耐，有兩架車喺我側邊飛過。

帶到嘅係架黑白86 Levin，跟住嘅係黑色EF9。

咪住先，架EF個車牌咁熟口面嘅？我決定跟上去睇下。

粉錦公路直路唔短，可以踩盡嘅地方都幾多。

我一路跟著，再望望錶版，都飛到成百。





再望返前面，架EF行到S形咁，好似想抽頭過，但架86又再揸快啲，重複幾次之後，架EF都未過到架86。

「唔對路喎，前面好似有隻左彎㗎喎。」我望住前面兩架車自言自語。

嗰兩架車好似無諗住收車，依我所見，佢兩個咁嘅速度片落隻彎實攬炒。

「屌！」我反覆確定有冇對頭車。

見到無之後，即刻地板油抽過對面線，爬咗兩條友，再Cut埋去，冚架AE86一巴，然後就打住死火燈收慢，帶住後面兩架車入個左彎，出彎之後，我同埋佢哋停埋一邊。





「你兩個搞乜呀？」我落車對Ella同Chris講。

「僖哥哥？你架車同上次唔同咗嘅？」

「僖哥好耐無見啦。」Chris話。

「你兩個到先唔收慢咁片落去實仆街。」

「所以你擋住我哋？」Ella問。

「唔通睇住你哋死咩？咁你哋究竟搞乜呀？」

「你問後面個癡線佬囉，都唔知佢做乜！」Ella好耐咁講。

我行埋阿Chris度。





「Chris哥你識嗰個女仔㗎咩？」我指一指Ella。

「唔識呀。」

「咁你做咩嚟呀？」

「喂，AE86喎，唔係唔推呀？」

「唔好亂嚟啦你，嚇親人哋啦。」

「係唔係呀？」

「行過去道歉啦。」





「哦。」

我同Chris行過Ella度。

「Sorry呀，到先嚇親你。」

「哼～」

「你原諒佢啦。」我加把口。

「好啦。」

一番鬧劇之後，Chris揸住架車走先，而我準備走嗰陣，Ella又行咗過嚟。

「僖哥哥，我架車個錶板着咗燈呀，係咩事呀？」





「我睇睇。」

行到去，架車果然係水滾。

「你架車過熱呀。」

「咁我要點呀？」

「打開頭冚先啦。」

一打開頭冚，我就比副偈吸引住。

「廿嘩佬機器⋯」我微笑著。





「唔～」

「無嘢呀，喺度等架車Cool down先啦。」

我同Ella喺度傾住計等。

「係呢，你做咩揀哩架車嘅？」

「我哥哥比我㗎。」

「你哥哥？」

「係㗎，咪上次揸黃色同白色車嗰兩個囉。」

兩兄弟揸RX7，但買架AE86比個妹咁得意？

「估唔到喎，你唔同佢哋揸同款車嘅？」

「我鍾意哩架車多啲。」

「原來係咁。」

傾傾下，架車都Cool down返，我喺我架車拎支蒸餾水，幫Ella入返啲水，廢事架車又擺低。

「唔該你呀僖哥哥。」

「唔洗客氣。」

「咁我走先啦，下次見啦。」

「ByeBye」