人要惡過車！: 第五十五章

我揸車去到個迴旋處，轉咗去錦田嗰邊。

「B呀，唔係嗰邊咩？嗰度寫住九龍同荃灣喎。」

「唔行隧道啦，隧道太貴啦。」

「哦～」

沿住一條鄉郊嘅道路一直行，去到一個巴士總站，隔離有間士多，就落車買枝茶飲下。





可能見我揸FD2，有三個後生仔行埋嚟傾計。

「師兄都係嚟大山？」

「咁啱要出荃灣啫。」

「我哋都上大山喎，一齊行？」

「ok呀。」





之後我哋各自上返自己車。

一個揸CL7，一個揸八代蘆筍，一個揸S202 sti。

我跟喺佢哋後面，好彩佢哋唔會行得好快。

講返行大山先，架車力水一定夠，而套避震拎嚟行大山未致於會硬到行唔到。攻彎嗰陣係會有啲啲推頭啦，但係可能要執執個brake，等佢再好收啲。整體上都ok啦，可接受到嘅。

上到山頂，佢哋轉上大停車場，而我直落荃灣。





「B，你要去荃灣邊度？」

「er⋯睇睇先，荃新天地呀。」

「Ok」

荃錦交匯處，落大河道北。我腦喺度編定路線。

泊好車，行入商場，去到一間化妝品店，出面大排長龍。

「搞咩咁多人？」

「今日三折呀，梗係多人啦，快啲去排啦。」

排咗好耐好耐，入到去堯好有目標咁買齊佢想要嘅嘢。





逃離化妝品後，我哋去咗一間買模型車仔嘅舖頭。

「咦。」

「做咩？」

「有你架車喎。」

「係喎。」

就係咁，我買咗兩架1:64嘅FD2，一架癡喺錶板上面裝飾，一架收喺屋企。