人要惡過車！: 第五十四章

喺公園坐咗陣，我哋就揸車去南生圍。

南生圍擠滿咗嚟郊遊、影相嘅人。

所以揸車入去並唔係一個明智嘅選擇，而我泊喺附近，慢慢同堯行入去算。

行行下見到一架好耐無見嘅車——白色AE111。

「喂僖仔，好耐無見。」





「Hi，輝哥你嚟南生圍做咩？」

「同屋企人嚟玩啫，你呢？」

「我嚟散下心。」

「哦～咁唔阻你啦，前面有檔豆腐花幾正㗎，你可以去睇睇。」

「好呀，咁下次再傾。」





「Bye」

同輝哥分開之後，我同堯真係行咗去間豆腐花舖度。

「啲豆腐花好似好好味咁喎～」

「你啱啱先食完飯喳喎。」

「唔緊要啦，嘻嘻。」





「無你乎。」我假裝無奈。

結果我哋坐喺度食豆腐花，認真飽到死。

正當回程嗰陣，豆腐花舖出面泊咗架熊貓色AE86。

心諗：乜料？睇得頭文字D太多？豆腐舖86？

再望真啲，原來係Levin嚟。

我自己認為明燈同跳燈各有各靚，所以無謂比較啦。

但架車真係好靚，應該翻噴同拋光嚟，成架新車咁樣，我見到都流口水。

「喂。」堯突然叫我。





「做咩？」

「睇你個樣係想買新車咁款喎。」

「無呀，我好鍾意依家架車。」

「咁你又眼甘甘望住出面架車。」

「架車真係好靚嘛。」

「下話。」

「不嬲我揀嘅係最靚嘅。」





「係呀，係呀，無你咁好氣。」

「點呀？行未呀？」

「係喎，同我出荃灣買啲嘢呀。」

「哦。」

之後我哋行返出去攞車。

咁元朗出荃灣就唔一定要行大欖隧道，都唔一定要行屯門公路嘅，係咪先。