人要惡過車！: 番外篇—— M

某一日，我收到來自阿皓嘅Whatsapp。

「有無睇嗰條片？」

片？咩嚟？

「咩片？」

「大埔公路嗰條喎？」





「咩嚟㗎？Send嚟睇吓。」

「ok」

之後我就收到條片。

條片嘅畫面分開上下半，分面係車頭同車尾嘅Cam嚟。

一開始架車係停咗喺廣福邨出九龍個巴士站。





過咗幾十秒之後，後Cam影到架寶馬旅行版五系慢慢嚟緊。

之後着閃燈，車上嘅差佬落咗車之後，前車突然呼兩下空油，即刻走。

後Cam影到嗰兩個差佬衝返上車追，架老隱跟住前車上咗大埔公路。

一段路仔之後，架車一百八十咁片落隻右彎，接住嘅直路就踩到二百三。再收慢少少，一百七咁過隻S彎，睇到哩度，架老隱都唔係好跟到。

估唔到嘅係片中嘅車會慢慢等埋架老隱追嚟，就快追到嗰陣又即刻比多啖油放佢，直頭係撚狗咁撚。





就係咁一追一放，去到中大對出，片中架車喺條大直路飛到三百幾，雖則架車好快，但架老隱都唔慢，估計都有二百幾。

去到麗坪路迴旋處之前，架車收慢等架老隱，而今次係兩架車第一次平排出彎，平排衝落沙田。

精彩嘅事嚟啦，喺迴旋處之後隻右彎，架老隱嘗試爬片中架車，點知唔成功之餘，比片中架車慢慢迫埋山邊。

越夾越埋，越迫越過，最終架老隱尷生比片中架車夾埋山邊，炒起埋，成架反咗。

與此同時，車cam片傳來兩下冷笑聲，而片中架車亦逃之夭夭。

「喂，咩車咁堅揪呀，夾得爆架老隱。」我問皓。

「睇埋哩條。」

今次哩條片係喺巴士司機位影出去，上緊山嗰陣影到兩架寶馬衝緊落去。





「唔怪得之夾得爆老隱啦，M5嚟喎。」

「你點睇條片？」

「我點睇？我覺得有啲嘥囉。」

「點㗰法？」

「佢攞架最新嘅M5嚟夾人哋架爛鳩5系，仲要夾得爆人哋架車喎，自己架車都重傷啦，花咗爛咗又要整，整又要錢。」

「可能佢有錢呢，不過你啱，攞架M5去玩碰碰車真係好嘥。」