人要惡過車！: 第三十三章

咁因爲琴日玩得太夜，我下晝先起身，我一張開眼，就見到個傻妹，令我不禁微笑。

起身第一個見到嘅係自己深愛嘅人係好開心嘅一件事。

「我整醒咗你呀？」阿堯問我。

「唔係呀。」

「肚餓未呀？我整啲嘢比你食呀。」





「好呀，唔該曬。」

「嘻嘻，去刷牙洗面啦。」

「嗯。」

我刷完牙，行出廳，一碗公仔麵喺我面前。

「一陣有咩做呀？」阿堯問我。





「耀哥搵咗我去試車，你嚟唔嚟呀？」

「好呀好呀。」

「你唔怕悶咩？」

「唔怕呀，睇住你揸車幾開心呀。」

「咁好啦。」





夜晚，我揸車嚟到耀哥車房。

「嚟啦，女朋友仔都嚟咗呀？」耀哥話。

「Hi」堯微笑。

「耀哥有咩玩呀今晚？」

「後面嗰部喳嘛。」耀哥指咗指車房部FK2。

「FK2？」

「係呀，你哋快啲上車跟我嚟啦，你架車泊住喺車房先啦。」

「哦。」





我上咗部FK2，跟著耀哥架EG6，上咗五號仔，再行七號仔，去咗九龍灣九展附近個油站。

講咗架FK2先，個避震係硬嘅，行龍翔道爛路係有啲彈嘅，但我覺得可以接受。咁副2.0T機器係好有力嘅，佢出力係線性嘅，唔會好大Turbo Lag，咁架車係正嘅，但我自己個人喜好鍾意NA多啲。

返嚟現實，我去到嗰陣見到架熟悉嘅車。

「喂，阿輝。」耀哥叫輝哥。

「終於嚟啦咩？」輝哥説。

「Hi 輝哥。」

「僖仔換咗車喎。」輝説。





「架車耀哥㗎，我借嚟揸喳嘛。」

「你邊度搵架FK2返嚟㗎？」輝問耀。

「你都傻嘅，買咪有囉。」耀答輝。

「你啱，哈哈，咁等兩個細佬鬥㗎喇喎。」輝哥講。

「無啦啦鬥咩？」我問耀哥。

「你咪求其同佢鬥下車囉。」耀哥輕鬆咁講。

「吓？」

「你ok㗎喇。」耀哥話。





之後有個揸Golf R嘅後生仔行過嚟。

「Hi 我叫Ricky呀，一陣經觀繞，入將軍澳調頭，再觀繞，終點喺返哩度，o唔ok。」

「哦，好呀。」之後我就返上車。

「喂耀，我坐你車。」輝叫耀。

我同Ricky喺九龍灣起步，衝上觀繞，我一路跟住佢尾，講真，2.0T同我之前玩過嘅1.6同1.8NA感覺唔同，係真係可以踩快啲。

咁觀塘繞道攝車就家常便飯啦，去到近觀塘碼頭出口個隻左灣，架Golf開始推頭，拋出咗少少，之後落將軍澳道，輕鬆上斜，過Autotoll，入將隧唔洗塞，劈住去。

出將隧之後條路又係爛曬嘅，咁架車彈吓彈吓，好好彩百幾衝住落去無炒，直行到環保大道迴旋處調頭，上返將隧，咁我都係推住佢行，但唔好搞錯，架Golf R係真係好快嘅，咁落將軍澳道斜，中右綫都比人頂住，架Golf唔係好識變通，又或者驚炒掛，咁我唔理佢啦，抽過左綫，爬哂中綫啲車，臨尾一刻先斬返埋中綫上觀繞，差啲就炒上磗。





與此同時，喺耀哥架車度。

「覺唔覺啱啱嗰下好熟口面？」耀哥笑住講。

「講起上嚟都好耐無見過人咁斬法。」輝哥都笑埋一份。

「係得嗰個癡線佬先做埋啲咁嘅嘢。」

「估唔到有人同癲佬一樣咁癡線。」

「睇嚟架Golf都無㗎喇。」

今次到Golf跟我尾，落到觀繞就地板油衝到百七，唔知點解係唔會驚㗎喎，明明咁嘅速度一撞就係咁先。最後我拖住架Golf返九龍灣。

「果然名不虛傳呀。我今次輸咗。」Ricky伸出右手。

「你都好勁呀。」我同Ricky握手。

「下次我一定砌低你。」

「樂意奉陪。」

「都話你得㗎喇。」耀哥話。

「好彩啫。」我笑咗笑，就返上車。

「返去啦。」我同堯講。

「好呀，你頭先好型呀。」

「梗係啦哈哈。」我喺度笑。

返到車房，換返自己架車，上到車，堯打咗個喊露。

「攰呀？訓陣先啦，返到去叫醒你啦。」

「好啦B。」

堯訓嗰陣我望過去，佢真係好得意，有一種令人愛不釋手嘅感覺。

希望你可以永遠喺我身邊啦。