人要惡過車！: 第二十六章（27/07/2020 Updated Version）

咁訓醒刷埋牙洗個面，夠鐘返學。我今日繼續係揸DC2。

「哦？唔同咗嘅架車？」堯好奇咁問。

「我借咗師傅架車揸嘛。」

「唔～～」堯若有所思。

「唔？做咩呀？」





「唔知點解有啲似嗲地架車咁嘅。」

唔通阿堯嘅阿爸又係揸DC2嘅？

「係咩？」

「係掛。」

就到燈位前，離遠見到架紅色458 Spyder，車牌係VEN1A 001。去到燈位望過去，車入面個後生仔喺度同個鬼妹打茄輪，望真啲，個男嘅我好似識㗎喎。







「呠。」我冒著比人燒春袋嘅風險，響咗一吓鞍。

個男嘅望咗過嚟。

「喂，好耐無見喎粉爺。」

「喂，好耐無見喎僖仔。」粉爺説。





「咁早去邊呀？」我問。

「返屋企呀，啱啱喺中環返嚟，你哋呢？」粉爺説。

「返學喳嘛。」

「哦～」與此同時轉咗綠燈。

「喂，下次見啦。」粉爺説。

講完之後佢就標咗出去，幾秒就唔見咗影。

「你識嗰個人㗎？」堯問我。

「佢係我中學同學嚟，依家好似係個作家。」





想當年中學佢仲話幾千蚊買架AE110代步，問我意見，之後佢開始喺連登寫故，成名作好似係《我杯雪梨茶俾條契弟溝撚咗薄荷》，之後出咗名就大把世界。

「哦～，我警告你唔好好似佢咁溝鬼妹呀。」堯突然認真起來。

「係嘅大人。」

「乖啦，嘻嘻。」堯偷笑。

唔知點解前面突然好塞車，咁唯有兜路行啦，順便開收音機聽吓咩事。

「依家係阿聰報導交通意外，屯門皇珠路有嚴重交通意外，據司機陳先生所講，一架紅色車失控翻側，依家皇珠路出九龍方向嘅快慢線都封閉，駕駛人士請考慮改行其他道路。之後係隧道情況⋯⋯」

「哦～原來頭先前面撞車，唔怪得之咁塞啦。」





「好彩你醒目，行第二條路，比個叻你。」堯話。

「得個叻喳？」我奸笑。

「唔係你仲想點？」堯面紅細細聲咁講。