《再見了，還會再見嗎？》: 第75章 – 偏心

返到屋企之後，我好快就攤咗上床。
 
「睇嚟呢個高中都唔易過，明明都未開始正式上堂就已經要開始補課」我自言自語。
 
攤咗一陣我就起返身，去咗書枱重温今日學嗰啲嘢。
 
「原來都唔係好難啫，咪又係好似小學嗰啲咩”距離除時間等於速率”」
 
到咗夜晚，我將啲一大疊嘅通告拎咗俾媽媽簽。
 




「今日返學點呀？有冇識到新朋友？」
 
估唔到媽媽竟然關心我喺學校嘅事。
 
老實講，我都已經習慣咗媽媽唔會點理我學校嗰邊嘅事。
 
「隔離位係個新同學囉，佢……」我將今日嘅經歷一一講咗俾媽媽知。
 
～第二日～
 




「今日有好多選修科嘅堂啊，好期待啊～」Anson對我講。
 
尋晚臨瞓嘅時候Anson打俾我，問我一唔一齊返學。
 
咁我當然冇所謂啦，都係朋友啫。
 
「又會咁啱今日三科選修都有得上嘅，唔知係咩人教呢？」我回應。
 
「我淨係收到風我哋班個數學老師係陳sir咋～」Anson故意笑一笑再望住我講。
 




好羨慕……
 
「好羨慕呢？你恨唔嚟㗎喇～」
 
「雖然我冇俾陳sir教過，但係都知你同佢好熟啦～ 成日都去下面揾佢～」
 
「唓，無論係邊個教數學，我都可以問陳sir啫，有乜所謂」我回應。
 
「又唔係咁講啊，你又唔係唔知有個數學老師好小氣，同所有老師都唔friend㗎啦」
 
「邊有咁好彩會係佢啊……」我講完呢句心入面都驚咗一驚。
 
上到4樓，我同Anson就各自返咗自己班房。
 
一早返去，見到Venice又喺到睇緊書。




 
依然都係睇緊尋日嗰本。
 
「Hello，早晨啊……」
 
我膽粗粗咁同佢打咗個招呼，話晒都係隔離位嘛。
 
而Venice嘅反應……
 
只係尷尬地望一望我，然後點頭……
 
算了，我都唔期望佢會理我。
 
我行咗過去locker嗰邊拎嚟緊三堂要用嘅書。
 




睇一睇望喺locker門上嘅時間表，第一堂係中文，然後係兩堂化學。
 
唉，始終都要上我最憎嘅中文堂。
 
除此之外，我仲拎咗本數學書出嚟，畢竟有興趣嘅科就係會想自己揭下啲內容。
 
喺我返咗位揭緊本數學書嘅時候，Parco移咗過嚟睇我做緊咩。
 
唔記得講添，Parco而家係坐喺我右邊，啫係隔咗條走廊嘅一個位。
 
「咁勤力嘅，果然係數神喎～」
 
「你幫我改埋啲咩名呀，好難聽啊」我睥住佢講。
 
「呢個名唔好咩，幾啱你吖～」Parco一邊笑一邊講。




 
唔知係我錯覺定點，Parco過咗個暑假好似講多咗嘢，成個人都開朗咗。
 
抑或只係我當初同佢唔熟所以冇乜交流呢？
 
不過有Parco都好嘅，因為今年冇再好似上年咁熱鬧，身邊有咁多朋友坐埋一齊。
 
唔好話坐附近啦，就算同班都係得阿天同Simon叫做熟啲。
 
但係佢哋都有堆同班第四年嘅波友一齊食飯一齊玩，又點會特登叫埋我呢，我去咗join都怕尷尬啦。
 
過咗冇耐，班主任Miss Cheung就入咗嚟。
 
「後面2個同學傾完未？見唔到我入咗嚟喇咩？」Miss Cheung 講緊嘅係我同Parco。
 




Parco即刻坐返埋自己個位，而我都扮嘢執返枱面啲書入櫃桶，費事同Miss Cheung對望。
 
點知Miss Cheung突然一轉語氣。
 
「喂，阿楊～ Cindy～」Miss Cheung揸住支咪企喺老師枱前講。
 
阿楊同Cindy係另一班精英班出身，啫係俾Miss Cheung已經教咗3年中文。
 
「係係係……」阿楊同Cindy一齊講。
 
我呢下真係呆咗。
 
呢啲就係親生仔同外人嘅分別？
 
跟住阿天同佢啲朋友，都喺中文堂因為傾偈而俾Miss Cheung點名話咗一兩次。
 
雖然知道佢出名偏心啫，但都唔係咁樣掛。
 
除咗阿楊同Cindy，佢哋仲有一班朋友一齊升上呢班。
 
佢哋就好似係上年嘅我同阿盈同Anson佢哋咁，但當然佢地今年同班第4年就一定熟好多啦。
 
希望嚟緊3年唔好太難捱啦。