《再見了，還會再見嗎？》: 第74章 – 奇怪的女生

我偷偷哋望下坐我隔離個女仔揸住嘅嗰本書個書名 - 《回到過去再愛你》 。
 
嗯，原來係愛情小說，仲以為佢睇緊啲咩文學添。
 
睇嚟我同佢都係傾唔埋。
 
我諗我對上一本睇嘅書，應該係好細個睇嗰本小王子。
 
見佢咁聚精會神，而且又好似冇打算同我打招呼咁，我都唔好意思去騷擾佢睇書啦。
 




過咗冇耐就到咗放學時間。
 
我望下出面，原來阿盈已經喺到，所以我都即刻執埋嘢出去。
 
因為之前一早應承晏晝同佢兩個人食，所以阿盈一放學就嚟咗我課室外面等我。
 
「等咗好耐喇？」我問阿盈。
 
「唔係啊，都係5分鐘左右咋嘛，行啦我哋～」阿盈笑一笑。
 




去咗學校附近一間餐廳坐低之後，我哋都向對方分享今日喺新班嘅事。
 
阿盈：「我哋嗰班得30幾人得10個男仔咋，原來M1真係冇乜男仔讀，個個都揀晒你哋M2嗰班」
 
我：「又會咁唔平衡嘅，我嗰班男女反而差唔多。但係坐我隔離嗰個女仔好奇怪囉，全日都揸住本書喺到睇」
 
阿盈：「你係咪講Venice啊？你以前同我同班㗎，係之前升中三嗰陣成績唔夠好先俾你呢啲人入到嚟咋嘛～」
 
乜原來佢叫做Venice。
 




個名好似幾有文化氣息咁嘅感覺。
 
我：「咩喎，我靠自己實力升上嚟㗎」
 
阿盈：「話時話，佢唔係咁易同人做朋友㗎喎。據我所知，佢一直嘅朋友都係得Chrissie嗰幾個，但佢哋今年都冇升返上嚟，所以你唔識㗎喇」
 
我：「我睇到佢睇書就已經知同佢做唔到朋友啦，使乜你講～」
 
阿盈：「叻喇叻喇，你又話今日有補課嘅？快啲食埋返去啦」
 
返到課室，我見到好多我識嘅同學坐晒喺到。
 
Zoe，Venice，Parco，阿天，仲有一堆今年同我同班嘅同學。
 
因為一陣Physics補課就係用返我個課室，亦啫係話呢到嘅人就會係我啲Physics班嘅同學。




 
我行咗返自己個位，見到Venice都係喺到睇緊書。
 
雖然同阿盈食完飯對佢了解多咗，但我都冇特登撩佢傾偈，而只係執下今朝派嘅一大堆通告。
 
過咗冇耐就開始補課，Venice繼續坐喺我隔離冇調到位，睇嚟佢真係冇咩熟嘅朋友。
 
反而Parco就拉咗張枱過嚟坐咗喺我右邊，我就變相夾咗喺佢哋兩個中間。
 
而家呢個組合就好似係3個冇朋友嘅人堆埋一齊咁。
 
不過都好嘅，叫做有個伴一齊上堂互相關照下。
 
哈哈，應該係得我同Parco兩個互相關照？我都唔知喇。
 




「大家打開本書第一課，我哋今日會教distance同displacement呢兩樣嘢有咩分別嘅，如果有時間就會講埋1.2嘅speed同velocity嗰啲」Physics阿sir對我哋講。
 
詳細嗰堂教咗咩，我都唔係好記得喇。
 
唯一記得嘅係開始上堂嘅時候，我好自然咁喺櫃桶拎本書出。
 
「車仔，可唔可以同我一齊睇，我今日冇帶到本書啊」旁邊嘅Parco同我講。
 
咁我就當然冇咩所謂啦，又唔係借走我本書。
 
「哦，好呀」我回應。
 
然後我移過咗少少本書，放喺我同Parco兩個人嘅枱中間。
 
過咗冇幾耐，阿sir有啲簡單計數題俾我哋做下。




 
喺我哋計嘅時候，阿sir行咗過嚟。
 
「你隔離位同學仔好似冇書喎，不如你哋三個人一齊睇住先啦」
 
我順手拉返本書喺三個人嘅中間。
 
Venice亦都望向我本書默默地計嗰幾條數。
 
落堂後，大家都拿拿臨執嘢走，當然我都唔例外啦。
 
忽然Venice拍一拍我細聲講。
 
「啱啱唔該晒你」
 




「幫下隔離位好小事啫」我回應。
 
Venice微笑點頭，然後就拎埋書包走咗。
 
到底佢係唔識同人溝通定係自閉……